Астанада халықаралық әйелдер форумы өтті

АСТАНА. 21 мамыр. Астанада VIII Астана экономикалық форумы аясында «Нұрлы жол – жаңа мүмкіндіктер» атты халықаралық әйелдер форумы өтті. Оған Мемлекеттік хатшы, Президент жанындағы әйелдер істері және отбасылық-демографиялық саясат жөніндегі ұлттық комиссияның төрайымы Гүлшара Әбдіқалықова қатысты. Бұл туралы akorda.kz хабарлады. Сондай-ақ, форум жұмысына Парламент Мәжілісінің депутаты М.Қазбекова, Ауғанстан Парламентінің депутаты Ш.Баракзай, БҰҰ Даму бағдарламасының әкімшісі Х.Кларк, бейбітшілік бойынша Нобель сыйлығының 2011 жылғы лауреаты Т.Карман, сондай-ақ, таяу және алыс шет елдердің саяси, экономикалық, бизнес-топтары өкілдері қатысты. Форумды ашқан Гүлшара Әбдіқалықова гендерлік теңдікті ілгерлетудегі және әйелдердің іскерлік белсенділігін арттырудағы еліміздің жетістіктерін атап өтті. Мемлекеттік хатшы институционалдық тәсілдерді жетілдірудің, әйелдер кәсіпкерлігін одан әрі дамытуға инвестициялар мен инновациялар тартудың және әйелдерді оқыту мен олардың біліктілігін арттырудың заманауи инфрақұрылымын жасау қажеттілігіне назар аударды. Комиссия төрайымы қазіргі кезеңде инфрақұрылымдық дамудың 2015-2019 жылдарға арналған «Нұрлы жол» мемлекеттік бағдарламасындағы жобаларды іске асыру ісіне әйелдердің көбірек тартылуын қамтамасыз ету маңызды екенін айтты. Сонымен бірге, форумда әлемдік жаңа трендтер жағдайында әйелдердің экономикалық белсенділігін одан әрі арттыруға қатысты сын-қатерлер мен мүмкіндіктер талқыланды. Форумды Қазақстанның іскер әйелдер қауымдастығы «Нұрлы жол – болашаққа бастар жол» жолдауын іске асыру аясында ұйымдастырды. Жұмыс қорытындысы бойынша әйелдердің экономикалық мүмкіндіктерін арттыру, олардың арасындағы жұмыссыздық деңгейін төмендету, көшбасшылық әлеуетін арттыру, сондай-ақ, Қазақстанда шағын және орта бизнесті қолдау жөнінде ұсынымдар әзірленді. Еламан Қоңыр. Дерек: akorda.kz. Сурет: todaynews.kz.