Қарағандыда заңды бұзған кәсіпорыннан 253 млн теңге өндіріліп алынды

ҚАРАҒАНДЫ. 27 тамыз. Қарағанды облысында өндіріс қалдықтары мен залалды заттарды қоршаған ортаға заңсыз шығарғаны үшін  «BasselGroup LLS» фирмасынан 253 миллион теңге өндіріліп алынды. Бұл туралы облыстық прокуратураның баспасөз қызметі хабарлады. Аталған кәсіпорын жылу және электр энергиясын өндірумен, жеткізумен және сатумен айналысады. Облыстың табиғатты қорғау прокуратуасы және экология департаменті бірігіп жүргізген тексеру кезінде кәсіпорынның 2015 жылдан бастап тиісті органдардың рұқсатынсыз өндіріс қалдықтары мен залалды заттарды қоршаған ортаға шығарып, табиғатты ластап келгені анықталды. Табиғатты қорғау прокуратурасы Қарағанды облыстық ауданаралық мамандандырылған экономикалық сотына «BasselGroup LLS» ЖШС-інен мемлекет пайдасына 253 миллион теңге өтемақы өндіріп алу туралы талап арыз түсірген болатын. Сот талап арызды толығымен қанағаттандырды. Қайрат Әбілдинов. Дерек: Қарағанды облыстық прокуратураның баспасөз қызметі. Сурет: azh.kz.