Қос дипломды магистрант

Қыздар университетінің магистрлері де ғылым көкжиегіне жолдама алып отыр. Жақында Қазақ мемлекеттік қыздар педагогикалық университетінде жоғары оқу орнынан кейінгі білім беру негізінде магистранттарға салтанатты диплом тапсыру рәсімі өтті. Магистрлер мерейін асырған мерекелік шарада университет ректоры Динар Нөкетаева Қыздар университеті ұлттық аккредит­теу агенттігі бойынша Қазақстан­дағы жоғары оқу орындары­ның арасындағы рейтинг топта­ма­сында 7-орынға ие болғанын қуана жеткізді. Биылғы шараның ерекшелігі, тұңғыш рет магистратура бо­йынша қос дипломды бағдарла­ма аясында шетелдік және қазақ­стандық дипломға ие болды. Мұн­дай бақыт – педагогика және психология мамандығы бойынша Әйгерім Жақыпбаеваның маң­дайына бұйырды. Ол АҚШ-тың Миссиссипи алқабы мемлекеттік университетінен қос дипломдық бағдарламасы бойынша дип­лом алып, «Балаларды дамыту орталығына қосқан үлесі және қызметі үшін» деген сертификатпен марапатталған. 2014-2015 оқу жылында білім ордасында 23 мамандық бойын­ша ғылыми-педагогикалық бағытта 171 магистрант диплом алды. Ал, оқуда оқ бойы озық шығып, үздік оқыған 30 магистрант университет ректоры қолынан дип­лом алды. 70 жылдық тарихы бар киелі қара шаңырақта мәдени-қоғамдық ұйымдастыру шаралары мен ғылым саласына қосқан үлестері үшін белсенді магистранттарға ректордың алғыс хатын бірінші проректор Баходир Алиев ­табыстады. Айнаш ЕСАЛИ, «Егемен Қазақстан». АЛМАТЫ.