Кондитерлер байқауы

Кеше қала күні мерекесіне орай елордада дәстүрлі «Кондитерлер фестивалі» өтті.  Тәтті тортты кім жақсы көрмейді дейсіз? Конгресс-холл сарайына жиналған қала тұрғындары мен қонақтарына  14-тен астам кондитерлік өнім шығаратын кәсіпорын өз өнімдерін ұсынды. Жоба  мақсаты − кондитерлік кәсіби шеберлікті шыңдай отырып, аспаздардың тәтті тағамдар дайындаудағы қарым-қабілеті мен  мүмкіндіктерін көпшілікке кеңінен таныстыру, дәріптеу. Ал, ұйымдастырушылардың пікірінше, фестиваль қоғам­дық тамақтану саласында мамандардың кәсіби деңгейін арттыруға сеп болмақ. Торттар − тәтті пирогтар түрі.  Италияда шығарылған. Италия тілінде кондитер дегеніміз −  торт дайындаушы − тортайо деп аталады. Торттар −  әртүрлі пішінде дайындалатын өнім. Әрбір торттың басты ингредиенті − крем. Сол кремнен сан алуан бейнедегі, тіпті, адам санасына сыймайтын тәттінің небір атасы жасалады. Жасыратыны жоқ, кейде адамның ұшқыр қиялы мен алтын уақытын жұмсаған үлкен еңбегін бір демде тамсана жеп қоюға дәтің бармай тұ­рады. Кейде, онысын кәдесый – ескерткішке балап, кесуге батылың жетпей жататын сәттер көп. «Кондитерлер фестивалі» аясында Астананың әсемдігін айшықтаған, сосын Елорда символы – қар барысы, «Жайлау» көріністерін паш ететін торттар көпшілік назарын анадайдан өзіне аударады.  Бұл жолы да тәттіден бас тартпайтын жұртшылық олар­ға өз таңдауларын жасап жатты. Сондай-ақ, мерекелік шара шеңберінде арнайы мамандардан комиссия  құрылып, олар да аспаз еңбегіне оң баға берді. Байқау қорытындысына сәйкес «Үздік мерекелік торт» ата­лымын «Апрель-2030» ЖШС, «Тәтті туынды» аталымын «Мад­лен» ЖШС, ­сон­дай-ақ, «Тәт­тілер патшасы» ата­лы­мы бойынша «Lucky café» кәсіп­орны жеңімпаз атанып, ­әрқай­сы­сы плазмалық теледидар иеленді. Байқауға қатысқан басқа да үміткерлерге бағалы сыйлық­­тар тарту етілді. Мерекелік шара соңы концерттік бағдарламаға ұласты. Раушан ТӘУІРХАНҚЫЗЫ, журналист. Суретті түсірген Ерлан ОМАРОВ.