Ресейдің жастары Шығыс өңіріндегі демалыс лагеріне келді

ӨСКЕМЕН. 28 тамыз. Ресей Федерациясынан «Алтай жастары» халықаралық лагеріне келген қонақтар өздерінің әсерлерімен бөлісті. Бұл туралы egemen.kz хабарлады. Екі күн бойы ресейлік жастар қазақ халқының салт-дәстүрі мен мәдениетімен жақын танысады. Аталған шараға Ресейдің Алтай аймағы мен еліміздің Шығыс өңіріндегі жоғары оқу орындарынан 50-ге жуық адам қатысуда. «Біздің басты мақсатымыз – тәжірибе алмасу, қазақ халқының ұлттық мәдениетімен жете танысу, ең бастысы, көрші елмен достық байланыс орнату. Сондай-ақ біз, Шығыс Қазақстан облысының жастарын өзімізге қонаққа шақырғымыз келеді. Біздің мемлекеттеріміз ұзақ жылдар бойы барлық салада әріптестік қарым-қатынасты үзген емес. Сондықтан, екі елдің тұрғындары тығыз байланыста болуымыз қажет. Ал қазір біз шығыс мәдениетінің ғажап үлгілерін көріп, тамсанудамыз», – деді Ресейдің Алтай аймағынан келген Анна Лазатова. Лагерде жастар түрлі семинарларға, жастар саясаты бойынша өзекті мәселелер қозғалатын сұхбат алаңдарына, «Fort Boyard» форматындағы спорттық-зияткерлік ойындарға, «Холи» бояу фестиваліне және ұлттық ойындар мен өзге де шараларға қатысады. Аталған бағдарлама өскелең ұрпақ арасындағы этникааралық қарым-қатынасты нығайтуға септігін тигізбек. Думан Анаш. Дерек, сурет: egemen.kz.