«Ертіс» жанкүйерлерге жаңа құрамын таныстырды

АСТАНА. 12 наурыз. «Ертіс» футбол командасы жанкүйерлеріне жаңа құрамын таныстырды. Жаңа маусымға тыңғылықты дайындалған павлодарлықтар қатарын бірнеше белгілі футболшымен толықтырды. Бұл туралы egemen.kz хабарлады. Маусым алдында «Ертіске» еліміздегі ең танымал футболшылардың бірі Самат Смақов пен Давид Лория келді. Сондай-ақ, өзге де отандық ойыншылар Павлодарға қоныс аударды. Қазақстандықтардан бөлек, «Ертіс» сапына шетелдік футболшылар да қосылды. Атап айтар болсақ, Ресейдің «Анжи», «Динамо» (Мәскеу) және «Локомотив» командаларында ойнаған Алан Гатагов бұдан былай «Ертістің» ойыншысы. Одан бөлек, Сергей Игнатьев пен Артем Самсонов есімді тағы екі ресейлік «Ертістің» намысын қорғайтын болады. Шеттен келген футболшылардың қатарында Иван Граф (Хорватия), Изу Азука (Нигерия) және Буркина-Фасо ұлттық құрамасының ойыншысы Аристид Басе бар. «Ертістің» бас жаттықтырушысының айтуынша, командаға негізінен жас және болашағынан үміт күттіретін ойыншылар келген. Биыл павлодарлық команда үшін мерейлі жыл. Клубтың 50 жылдығын атап өтетін ұжым маусымды үздік нәтижемен аяқтауды мақсат тұтады. «Ертіс» ел чемпионатын бес рет жеңіп алған алғашқы команда екенін айта кетейік. Еламан Қоңыр. Дерек: egemen.kz. Сурет: fc-irtysh.kz.