Кешегі ойындарда қызыл қағаз қаншалықты әділ болды? (видео)

АСТАНА. 12 наурыз. Кеше түнде Чемпиондар лигасының 1/8 финалында екі ойын өтті. Бұл туралы egemen.kz хабарлады. Бір қызығы, екі ойында да қызыл қағаз тіркеліп, футболшылар алаңнан қуылды. Дәл осы жайт жанкүйерлер арасында қызу талқыға түсуде. Көпшілігі төрешілердің тым асыра сілтеп жібергенін айтуда. Тіпті кейбір жанкүйерлер ««Челсиге» төреші де көмектесе алмады. «Шын шеберге тұсау жоқ» деген осы», – деп қызыл қағаздың орынсыз болғанын сынға алуда. Қалай десек те, болған іс болды, бояуы сіңді. Енді ПСЖ-ның ширек финалдағы алғашқы ойынына Златан Ибрагимович қатыса алмайды. «Бавария» мен «Шахтер» (Донецк) арасындағы ойында бас қазы қалтасындағы қызыл қағазды 3-минутта-ақ пайдаланды. Өз айып алаңында Марио Гетцені шалып жыққан Александр Кучер денесі қызып та үлгерместен, алаңнан кетуге мәжбүр болды. Ол аздай бас қазы «Баварияның» пайдасына пенальти белгіледі. Бұл жерде де қызыл қағаздың әділ болмағаны айтылуда. Жанкүйерлер арасында «Сары қағазбен шектелсе де ешкім ренжімейтін еді. Тіпті мюнхендіктер де «неге қызыл қағаз емес?» деп шу шығармайтыны анық. Бірақ төрешінің ойы мүлдем басқа болып шықты», – деген сыңайдағы пікірлер туындауда. Сіз, қалай ойлайсыз, құрметі оқырман? Қызыл қағаз қаншалықты әділ болды? Еламан Қоңыр. Дерек: egemen.kz. Сурет: twitter.com.