Ақтөбеде аналарға алтын және күміс алқалар тапсырылды

АҚТӨБЕ. 12 наурыз. Ақтөбе қаласы әкімінің орынбасары Айгүл Арынғазиева бір топ көп балалы аналарға «Алтын алқа» және «Күміс алқа» белгілерін салтанатты түрде табыстады. Бұл туралы egemen.kz тілшісі хабарлады. Әкім орынбасарының айтуынша, бүгінгі күні қаламызда 5971 көп балалы ана тұрады, оның ішінде 1285-і «Алтын алқа», 1513-і «Күміс алқа» иегерлері. Сондай-ақ, 285 «Батыр ана», 342 I, II, III дәрежелі медаль иегерлері бар. Айгүл Арынғазиева қала әкімдігі көпбалалы аналарға қолдау көрсетуді дәстүрге айналдырғанын, осы жолы сондай сегіз анаға «Алтын алқа» және «Күміс алқа» белгілері тапсырылғанын айтып өтті. Одан бөлек, ол жыл санап көп балалы аналар қатарында жас аналар саны артып келе жатқанын жеткізді. Арнайы ұйымдастырылған жиында Айгүл Арынғазиева Елбасы Нұрсұлтан Назарбаевтың Жарлығына сәйкес, ақтөбелік Райхан Әлжанова, Алма Қарабалина, Маржангүл Қасенова, Гүлмира Пахриддинова және Айткүл Оразынбетоваға «Алтын алқа», ал Гүлмира Жұмағалиева, Қызғалдақ Нияз, Райхан Наурызалинаға «Күміс алқа» белгілерін табыс етті. Сатыпалды Сәуірбай. Дерек: egemen.kz. Сурет: qiyan.kz.