Президенттікке кандидат ретінде тағы 1 әйел тіркелді

АСТАНА. 12 наурыз. Президенттікке кандидат ретінде Айгүл Өтепова есімді әйел тіркелді. Бұл туралы gazeta.kz хабарлады. ОСК төрағасының орынбасары Владимир Фосс:«Президенттікке ұсынылғандардың арасында 2 әйел бар. Лимана Қойшиева қол қою парақтарын алды. Екіншісі уақытша жұмыссыз, шымкенттік Айгүл Өтепова», – деді. Оның айтуынша, А.Өтепова алдағы уақытта үміткерлердің мемлекеттік тілді еркін меңгергендігін анықтау жөніндегі лингвистикалық комиссияға сынақ тапсырады. Айта кетейік, 6 наурызда Қазақстан Республикасы Орталық сайлау комиссиясында Қазақстан Республикасының Президенттігіне кандидат Лимана Қойшиева мемлекеттік тілді еркін меңгергендігін анықтау жөніндегі лингвистикалық комиссияға сынақ тапсырған еді. Комиссия ашық дауыс беру арқылы көпшілік дауыспен Қазақстан Республикасының Президенттігіне кандидат Лимана Қойшиеваның мемлекеттік тілді еркін меңгергені туралы шешім қабылдаған-ды. Жолдыбай Базар. Дерек, сурет: gazeta.kz.