АҚШ-та Барак Обаманың кесірінен жас әйел көшеде босанып қалды

АСТАНА. 4 сәуір. АҚШ-тың Кентукки штатында жүкті әйел ел президенті Барак Обаманың кесірінен көшеде босануға мәжбүр болды. Луисвилл қаласында тіркелген жайт қазір әлеуметтік желілерде қызу талқылануда. Бұл туралы РИА «Новости» хабарлады. Жүкті әйел ауруханаға хабарласып, толғағы келгенін айтқан. Бірақ, көшедегі кептеліске тап болған жедел жәрдем көлігі межелі жерге жете алмады. Сол кезде өз күшімен ауруханаға бармақ болған әйел де кептеліске тап болады. Мұндай көлік қарбаласы қалаға президент Барак Обаманың келуіне байланысты пайда болған. Толғақ қысқан азаматша амалсыздан көлікте босануға мәжбүр болды. Абырой болғанда, дәл сол кезде кептелісте тұрған көліктердің бірінен медбике шығып, жас ананы аман-есен босандырып алды. «Қазір анасы мен сәбиі ауруханада. Екеуінің де денсаулығы өте жақсы», – дейді дәрігерлер. Өмірге ұл бала келгенін айта кетейік. Дәл осындай жағдай өткен жылдың шілде айында Лос-Анджелес қаласында болған еді. Ол кезде толғағы келген әйел жолдың арғы бетіндегі ауруханаға жету үшін жарты сағат күткен. Себебі, дәл сол сәтте аталған көшеден Обаманың кортежі өтуіне байланысты жол жабық болды. Қазір АҚШ тұрғындары арасында бұл жайт қызу талқылануда. Тіпті twitter әлеуметтік желісінде #ObamaBabyWatch хэштегі пайда болып, ол жерде америкалықтар өз ойларын білдіруде. Кейбірі: «Бұл ақылға сыйымсыз дүние. Мұндайға қалай жол беруге болады?», –деп наразылығын ашық білдірсе, енді бірі: «Обама әйел құқығын қорғауда чемпион атанды», – деп ойын астарлы сөзбен жеткізген. Еламан Қоңыр. Дерек, сурет: РИА «Новости».