Бесінші сессияның жүгі салмақты болмақ

Кеше Парламент палаталарының бірлескен отырысында бесінші шақырылған Қазақстан Парламентінің V сес­сия­сы өз жұмысын бастады. «Қазақстан Республикасының Парламенті және оның депутаттарының мәртебесі ­туралы» Конституциялық заңға сәйкес оның жұмысын Президент Нұрсұлтан Назарбаев ашуға тиісті еді. Бірақ, осы күндері Президенттің Қытай Халық Республикасында мемлекеттік сапарда болуына байланысты Елбасы тапсырмасына сәйкес сессияны Мәжіліс Төрағасы Қабиболла Жақыпов ашты.     Сессияның ашылуы салтанатты түрде жарияланғаннан кейін еліміздің Әнұраны орын­далды. Одан әрі Мәжіліс Төрағасы әріптестерін жақсы демалып келулерімен құттықтай отырып, енді Елбасының тапсырмасына сәйкес заң шығару жұмыстарының қауырт ке­зеңі басталатынын айтты. «Қазіргі таңда біздің алдымызда Елбасының жүктеген міндеттері бойынша орасан зор жауапты жұмыстар тұр. Олар Парламенттің қос палатасы мүшелерінен үйлесімді, бірлескен және ұйымшылдықты істер күтеді. Сонымен қатар, әр­­қайсымыздан жауапкершілік пен жоғары кәсібилікті талап­­ етеді», – деді Қабиболла Жақыпов. Сондай-ақ, Төраға Елбасы Нұрсұлтан Назарбаев сапардан келген соң өзінің жоспарларын айтатынын жеткізді. Осымен Мәжіліс Төрағасы өзінің қысқа сөзін аяқтап, барлық депутаттардың жұмыстарына сәттілік тілеп, бірлескен отырыс жұмысын аяқтады. Қос палатаның депутаттары да өздеріне жүктелген қауырт жұмыстардың салмағын сезініп, жұдырықтай жұмылып жұмыс істеуге дайын сияқты. Олардың жинақылықпен жүрген сергек қалыптары осыны аңғартады. Бірлескен отырысқа Қазақстан Республикасының Премьер-Министрі, Мемлекеттік хатшысы, Президент Әкімшілігінің Басшысы, Конституциялық Кеңестің, Жоғарғы Соттың және Орталық сайлау комиссиясының төрағалары, Үкімет мүшелері, Республика Президентіне тікелей бағынатын және есеп беретін мемлекеттік органдардың бас­шылары, Президент Әкім­ші­лігінің, Премьер-Министр Кеңсе­сінің, Парламент палаталары аппараттарының жауапты қыз­мет­керлері және бұқаралық ақпа­рат құралдарының өкілдері қатысты. Сонымен, бесінші сессия депутаттардың алдына үлкен жұмыс ұсынып отыр. Осы сессияда 300-ге жуық заң жобасын қарастыру жұмыстары алда тұр. Жазғы демалыстарында де­путаттар аймақтардағы халық­пен де кездесіп, оларды алаңда­татын көптеген мәселелерді сайлаушылардың өз ауыздарынан естіп келді. Соның ішінде халықтың мұң-мұқтажын, іскер топтардың өз бизнестерін дамы­туға жағдай жасауға ықпал ететін заңнамалар қажеттігін біліп отыр. Бұл жөнінде бізбен ойын бөліскен Мәжіліс депутаты Камал Бұрханов былай деді: «Біз каникул күндерінде халықпен кездестік, олардың өздерін толғандыратын мәселелерін тыңдадық. Сонымен бірге, өтініш, шағымдарын да алып, олар туралы орталық билік органдарына депутаттық сауалдар жолдайтын шығармыз. Қазір соларды сараптап, көмекшілерімізбен бірге жұмыс істейтін боламыз. Жаңадан ашылған сессияның ерекшелігі сол, онда орасан көп заң жобалары қаралатын болады. Соның ішінде 78 заң жобасын жаңа жылға дейін қарауымыз қажеттігі айтылды. Олар Президенттің 5 институт­тық реформасын іске асыруға мүмкіндік беретін заңнамалар болады. Олардың бәрі жоғары сапалы, экономикалық жағынан тиімді болуы үшін депутаттарға біраз тер төгуге тура келеді». Сенатор Владимир Бобров та осы тұрғыда ой бөлісіп, халықтың көңіл-күйі мен ахуалына байланысты өз пікірін ортаға салды. «Мен өнеркәсіп, энергетика саласының қызметкерлерімен, кәсіпкерлерімен, ауыл шаруа­шылығы еңбеккерлерімен кез­дестім. Менің кездесулерім, тіпті ұлттық валюта бағамын еркін айналымға жіберілгеннен кейін де болды. Сондықтан негізгі әңгімелер осы тарапта өрбіп, кездескен жандардың бәрі теңге бағамының еркін айналымға жіберілгенін дұрыс деп санайтындықтарын айтты. Ауыл шаруашылығы кәсіпкерлері импорттың азаюына байланысты өздерінің өнімдеріне сұраныс артатынын айтып, бұл шараның өте орынды болғанын жеткізді. Ал жаңа сессияда бізге қауырт жұмыс істеу қажеттігі жаңа да айтылды, бұған дейін де айтылған болатын. Президенттің 5 институттық реформасын іске асыруға бағытталған 100 қадамның заңдылық тұрғыдан негіз болатын заңнамалар біздің қарауымызды күтіп отыр. Бұл заңдардың  жобасын жасаушылар да жаз бойы қауырт жұмыс істегенін білеміз. Ендігі міндет біздің мойнымызда», – деді ол. Парламент палаталарының өмірдің барлық саласы бойынша­ біліктілігі жоғары, заң шы­ғар­­ма­шылықта кәсіби шеберлігі шың­далған депутаттары Ел­басы­­ның­ өздеріне жүктеген күрде­лі­ мін­деттерін ­абыроймен орын­­­­­дай­тын­дарына сенім білді­рейік. Жақсыбай САМРАТ, «Егемен Қазақстан». * Депутат дауысы

Жауапкершілік пен жоғары кәсібилікті талап етеді

Ерболат МҰҚАЕВ, Сенат депутаты: – Парламенттің 5-ші шақырылған 5-ші сессиясы өз жұмысын бастады. Ендігі біздің алдымызда тұрған міндет айқын. Ол – Елбасының тапсырмаларын орындап, берген міндеттемелерінің үдесінен шығу. Солардың ең бастысы – 5 институттық реформа мен осы реформаға қатысты жүзеге асырылатын 100 нақты қадам. Демек, бізді алдымызда үлкен, қауырт, күрделі жұмыстар күтіп тұр. Әрине, қазіргі таңда әлем ауыр эконо­микалық жағдайды бастан кешіп отыр. Жаһанда болып жатқан экономикалық қиыншылықтардың салқыны бізге де тиіп жатқаны жасырын емес. Сондықтан Үкімет Президенттің тапсырмасына сәйкес, жаңа экономикалық реформа қабылдаған болатын. Сол реформаны жүзеге асыру мақсатында Парламент аянбай, Үкіметпен бірге бірлесе қызмет атқаратын болады. *  *  * Сәкен ЖЫЛҚАЙДАРОВ, Мәжіліс депутаты: – Жазғы демалыс кезінде Талдықорған, Алматы өңірлерінде болып, сол жақтың жұртымен кездестік, түрлі мекемелерге барып, тыныс-тіршілігімен таныстық. Мәселен, алты ауданның кейбір ауылдарында болып, ондағы жұрттың жер, баспана, сот шешімдеріне қатысты туындаған пікірлері мен өтініш-тілектерін естідік. Себебі, мұның бәрі біздің жұмысымызға қажет. Бұл бұрын қабылданған заңдардың қажеттілігін білу, алдағы уақытта қабылданатын заңдардың жобасын таразылау, сараптан өткізу үшін де керек. Әрине, өмір бір орында тұрмайды. Мәселен, осыдан бірнеше жыл бұрын қабылданған заңдарды қайта қарау қажеттілігі де туындауы мүмкін. Себебі, заман өзгеруде. Ол кезде қойылған талап бір бөлек те, қазіргі таңда қойылып отырған талап мүлде бөлек. Сондықтан, қоғам ілгерілеген сайын, ондағы заңдар мен олардың ереже-нормалары да соған сәйкестенуі тиіс. *  *  * Андрей БЕГЕНЕЕВ, Мәжіліс депутаты: – Президент біздің алдымызға ауқымды міндеттер қойып отыр. Бесінші сессия барысында экономиканың ел өмірін жақсартуына қатысты заңдық құжаттарды қабылдауда көп тер төгетін боламыз. Қазіргідей қиын кезеңде заңдарды жетілдіру өте маңызды. Соның ішінде қазақстандық үлесті барынша арттыру міндеті тұрғанын атап кеткен жөн. Бұл, әрине, жұмыс орындарын ашып, халықтың тұрмыс жағдайын жақсарту үшін қажет. Қазақстандық тауарлардың әлемдік рыноктағы танымдылығы жоғары болуы үшін шағын және орта бизнесті қолдау керектігін ерекше атап кетпекпін. Әсіресе, ауыл шаруашылығы саласында жұмыс істеп жүрген шаруа қожалықтарын қолдау арқылы олардың аяғынан нық тұрып кетуіне жағдай жасау. Кәсібін өркендеткісі келетіндерге әртүрлі жеңілдіктер жасау қолдаудың оңтайлы тетігі деп білемін. Бұл ретте екінші дәрежелі банктердің кәсіпкерлерді қысымға алуы емес, керісінше, қолдау тұрғысында өз жұмыстарын үйлестіруі орынды болмақ. Заңдық тұрғыдан банктерді халыққа барынша жақындату жағын ойластырғанымыз абзал. *  *  * Нұртай САБИЛЬЯНОВ, Мәжіліс депутаты: – Қазіргі таңда еліміздің ауыл шаруашылығына қатысты кез келген мәселе өте өзекті әрі маңызды. Мәселен, халықпен кездесу барысында түрлі мәселелер көтеріледі. Ел тұрғындары көбіне ауыл шаруашылығы өнімдерін өңдейтін кәсіпорындардың жоқтығы сынды мәселелерді көтеріп, бұл салаға ерекше назар аудару қажеттігін сұрап жатады. Біз алдағы уақытта Парламентте, міне, осы тектес мәселелерді айрықша қарастырып, зердеден, сын елегінен өткізуіміз қажет. Жалпы, ендігі кезекте елдің әлеуметтік-экономикалық дамуын жақсартатын заң жобаларын қабылдауымыз керек деп ойлаймын. Себебі, әлемнің қандай құбылмалы күйде тұрғаны баршаға аян. Ал мұндай жағдайда халықтың жағдайы, өмір сүру сапасы ерекше назарда тұруы тиіс. *  *  * Гүлжан ҚАРАҚҰСОВА, Мәжіліс депутаты: – Биылғы жылы біздің алдымызда өршіл және күрделі міндеттер тұр. Президент айқындап берген «100 нақты қадам» – Ұлт ­жоспары бойынша заң жобалары әзірленуде. Сөз реті келгенде Парламент Мәжілісіне қазіргі кезде 59 заң жобасының келіп түскен­дігін айта кету керек. Президент 70-тен аса заңдық құжат туралы айтқанына қарағанда, заң жобалары тағы да келіп түсуі мүмкін. Қазіргі әлемдегі жағдайларды қаперге алсақ, біздің алдымызға қысқа ғана уақыт ішінде барлық заңдық құжаттарды сапалы әзірлеу міндеті қойылып отыр. Бұл заңдық құжаттар 2016 жылдың 1 қаңтарынан бастап «100 нақты қадамды» жүзеге асыруға кірісіп кету үшін қажет. Осы жерде 2016-2018 жылдарға арналған алдағы үшжылдық республикалық бюджет жобасының палата қоржынына келіп түскендігін де атай кетейін.