Футбол. «Тобыл» маусымдағы алғашқы жеңісіне қол жеткізді

АСТАНА. 5 сәуір. Футболдан Қазақстан премьер-лигасы аясында өтіп жатқан 5-турдың тағы екі ойыны аяқталды. «Тобыл» өз алаңында «Шахтерды» 4:1 есебімен жеңсе, Талдықорғанда өткен жергілікті «Жетісу» мен «Ертіс» арасындағы кездесу 2:2 есебімен тең аяқталды. Бұл туралы egemen.kz хабарлады. «Тобыл» мен «Шахтер» арасындағы ойында алаң иелері айқын басымдық танытты. Матч барысында Қазақстан футболының жарық жұлдызы Нұрбол Жұмасқалиев үш бірдей гол соғып, хет-трик атанды. Бұл – «Тобылдың» маусымдағы алғашқы жеңісі. Әзірге қостанайлықтар турнир кестесінде 5 ұпаймен 8-орында келеді. Ал төрт ойын қатарынан жеңілген «кеншілер» ең соңғы орында. Келесі турда «Тобыл» Атырауға қонаққа барса, «Шахтер» «Жетісуды» қабылдайды. Талдықорғандағы ойын да аса тартысты өтті. Алғашқы таймда есеп ашылған жоқ. Есесіне, кездесудің екінші бөлігінде қарсыластар екі голдан соғып, жанкүйерлерді қуанышқа бөледі. «Ертіс» ойыншылары 0:2 есебімен жеңіліп жатып, таразы басын теңестіргенін айта кетейік. Екінші голды павлодарлықтар соңғы минутта соқты. Әзірге қос команданың турнир кестесіндегі жағдайы аса мәз емес. Бес ойыннан 4 ұпай жинаған «Ертіс» 10-орынға табан тіресе, 3 ұпайы бар «Жетісу» 11-сатыға жайғасты. Талдықорғандықтардың келесі турдағы қарсыласын жоғарыда айттық. Ал «Ертіс» 8 сәуірде 7-турдың ойынын алдын ала өткізеді. Бұл күні олар «Қайратпен» күш сынасады. Дәл қазір 5-турдың қалған үш ойыны өтуде. «Астана» «Ақтөбені», «Қайсар» «Атырауды» және «Қайрат» «Оқжетпесті» өз алаңдарында қабылдауда. Әзірге бұл кездесулерде есеп ашылған жоқ. Бұған дейін Шымкентте «Ордабасы» «Таразды» 1:0 есебімен жеңгенін айта кетейік. Аталған ойын туралы мына жерден біле аласыздар.   Тобыл (Қостанай) – «Шахтер» (Қарағанды) 4:1 (0:0) 5 сәуір. Затобольск. «Затоболец» стадионы. Төреші: Б.Абдуллаев (Қаратау). «Тобыл»: А.Петухов, Ш.Кучера (А.Әнуар 56), И.Садовничий, Н.Кургулин, Р.Аслан, Н.Шливич, А.Богданов, Т.Симкович, Н.Жұмасқалиев, С.Мошников (О.Красич 33), У.Калу (И.Бугаев 84). «Шахтер»: И.Шацкий, М.Габышев, А.Дэвид, А.Порываев, А.Джидич, Н.Покривач, Г.Наджарян (Г.Васильев 64), А.Карпович (П.Сасс 67), Я.Вошаглик, Р.Мұртазаев, М.Топчагич. Голдар: Н.Жұмасқалиев 62, 66, 89, Т.Симкович 84 – Г.Наджарян 59. Ескертулер: Н.Покривач 44, А.Дэвид 71.   «Жетісу» (Талдықорған) – «Ертіс» (Павлодар) 2:2 (0:0) 5 сәуір. Талдықорған. «Орталық» стадионы. Төреші: А. Әлиев (Алматы). «Жетісу»: А.Пасеченко, С.Сағындықов, Д.Эргашев, М.Михайлов, М.Азовский, С.Сариев (М.Мұжықов 88), И.Цветкович, М.Шахметов (Б.Тұрысбек 81), Т.Данилюк, Д.Савич, Д.Деспотович. «Ертіс»: Д.Лория, П.Әлиев, А.Кислицын, В.Чернышов, А.Самсонов, С.Смақов, Қ.Гетериев, И.Азука, А.Гатагов, Г.Сартаков (А.Сүлей 81), А.Бансе. Голдар: Д.Деспотович 58, Д.Савич 67 – И.Азука 75, П.Әлиев 90. Ескерту: П.Әлиев 35. Еламан Қоңыр. Дерек: egemen.kz. Сурет: fc-tobol.kz.