Ықпалдастықты нығайту жайы қарастырылды

7 тамызда Ташкенттің төрінде Қазақстан, Қырғызстан, Өзбекстан, Тәжікстан және Жапония мемлекеттерінің сыртқы істер министрлері бас қосып, “Орталық Азия – Жапония” үнқатысуы аясында келелі мәселелерді талқылады. Осымен үшінші рет өткізіліп отырған кеңеске Өзбекстан Сырт­­қы істер министрі В.Норов, Жапо­ния Сыртқы істер министрі К.Ока­да, ҚР Мемлекеттік хатшысы – Сырт­­қы істер министрі Қ.Сауда­баев, Қыр­ғызстан Сыртқы істер министрі Р.Қазақбаев, Тәжікстан Сыртқы іс­тер министрі Х.Зафари және Түркі­менстан Республика­сы­ның Өзбек­стан­дағы Төтенше және өкілетті елшісі С.Пірмұхамедов қатысып, “Орталық Азиядағы бей­бітшілікті нығайту және тұрақ­тандыру мен әрі қарайғы әріптес­тіктің перспек­тивалары” тақыры­бын­да қазіргі кезде туындап отыр­ған мәселелер жөнінде пікірлесті, қордаланған проблемалардың шешілу тетігін қарастырды. Жиында әр мемлекеттің өкіл­дері екінші басқосуда қабылданған мақсат-міндеттердің орындалу барысына талдау жасап, жүзеге асы­рылған жұмыстарды мақұл­дады. Сонымен қатар, Орталық Азия + Жапония” үнқатысу жос­парының өз елдерінде қалай ор­ындалып жатқандығын нақтылады. Жапония министрі Кацуя Ока­да Орталық Азия мемлекеттерінің жалпыға ортақ аймақтық тұрақты­лы­ғын сақтау мен дамуына бай­ла­нысты қабылданған шешімдердің, сондай-ақ әріптестіктің түсініс­тік­пен шешіліп келе жатқанына ризашылығын білдірді. Үнқатысуға қатысушылар Қыр­ғыз Республикасындағы қалыптас­қан түйінді мәселелерге, оның ше­шілу тетіктеріне де тоқталып, Мем­лекет басшыларының ондағы саяси жағдайды тұрақтандыру, әлеумет­тік-экономикалық сектор мен ин­фра­құрылымдарды реттеу және елдің әрі қарай дамуындағы ұста­нып отырған ұстанымына жылы лебіздерін білдірді. Қырғыз Рес­публикасындағы жағдайға көз жұмып қарауға болмайтындығын, тұ­рақтылықты сақтауға қай-қайсы­ның да көмек қолын созуға дайын екендігін атап өтті. Жиында ЕҚЫҰ-ның Іс басын­дағы төрағасы, ҚР Мемлекеттік хат­шысы – Сыртқы істер минис­трі Қ.Саудабаев сөз алып, үнқа­тысуға байланысты Қазақстанның өз мін­деттемелерін толық орындап келе жатқандығын ортаға салды. Қанат Саудабаевтың атап өтке­нін­дей, Қазақстан ЕҚЫҰ-ның тө­рағасы ретінде басым бағыттар – бейбіт­ші­лікті сақтап, тұрақтылық­ты қалып­тастыруға зор үлес қосып ке­леді. Осы жиынға жапон жағы­ның қа­тысуы көрші елдердегі су-энер­гетикалық ресурстар, инфра­құры­лым, коммуникация және ондағы халықтардың жағдайын жақсарту бағдарламасына қатысты қабылдан­ған басты жобалардың жүзеге асуына көмектесетіндігіне сенімді екендігін атап өтті. Бақтияр ТАЙЖАН.