Азаматтар құқы жақсы қорғалуы тиіс

Мемлекет басшысы Нұр­сұл­тан Назарбаев Ақордада еліміз­дің құқық қорғау жүйесін рефор­малау мәселелері бойынша кеңес өткізді, деп хабарлады Қазақ­стан Республикасы Президенті­нің баспасөз қызметі. Кеңеске Премьер-Министр Кәрім Мәсімов, Президент Әкім­шілігінің Басшысы Аслан Мусин, Қазақстан Республикасы Прези­дентінің көмекшісі – Қауіпсіздік Кеңесінің хатшысы Марат Тә­жин, Конституциялық Кеңестің Төрағасы Игорь Рогов, Бас Прокурор Қайрат Мәми, Әділет министрі Рашид Түсіпбеков, Пре­зидент Әкімшілігі Басшысының орынбасары Талғат Донақов қатысты. Кеңесті ашқан Елбасы құқық қорғау жүйесін реформалау мін­деті өзінің “Жаңа онжылдық – жаңа экономикалық өрлеу – Қа­зақстанның жаңа мүмкіндіктері” атты Қазақстан халқына биылғы Жолдауында баяндалғанын атап өтті. Жолдауда Қазақстан құқық қорғау жүйесін реформалаудың бірқатар бағыттары – құқық қор­ғау жүйесін оңтайландыру, әрбір мемлекеттік органның айқын құзыреттерін түзіп шығу, заңдарды ізгілендіру мен сапасын арттыру қажеттігі даралап көрсетілген бо­латын. Осыған байланысты Мем­лекет басшысы Үкіметке құқық қорғау жүйесін реформалау ту­ра­лы заң жобасын жоғары халық­ара­лық қалыптарға сай болатын­дай етіп әзірлеп, биылғы жылы Парламентке енгізуді тапсырды. Мемлекет басшысы қылмыс­сыз­дандыруға баса назар аудару қажет екенін атап өтті. Заңдар әлде­қайда ізгіленген болуы тиіс, ал бас бостандығынан айыру түрін­дегі жазаны кей жағдайларда ірі көлемде айып салу немесе қоғамдық жұмыстарға тарту се­кілді балама шаралармен ауыс­ты­ру­ға болар еді. Сондай-ақ, жаза­сын өтеу орындарынан босатыл­ған­дардың қайтадан қылмыскер­лер қатарын толықтырмауы үшін оларды бейімдеумен айналысу да маңызды болмақ. – Құқық қорғау ведом­ство­лары­ның бірін-бірі қайталауын болдырмай, олардың жұмысын тиім­ді ету, әлемдік тәжірибені пайдалана отырып, бұрынғы ке­ңестік жүйенің келеңсіз мұра­лары­нан арылу қажет. Біз өткен жылдарда көп іс атқардық. Мұны барлық әлемдік сарапшылар ай­тып отыр. Енді осы реформаны ат­қару қалды. Біз өз азамат­та­ры­мыздың құқықтары жақсы қор­ғал­ғанын, кәсіпкерлердің қорғал­ғанын, құқық қорғау жүйесінің өзіндегі сыбайлас жемқорлыққа тосқауыл қойылғанын қалаймыз. Жауапкершілікті күшейту маңыз­ды және бұл органдардың әр­қайсысы өз ісімен айналыса­тындай ету керек, – деп атап көрсетті Президент. Кеңесте Премьер-Министр К.Мәсімов сөз сөйледі. Үкімет басшысы Президент Жолдауында айтылған әрбір бағыт бойынша құрылған комиссиялардың жұмысы туралы, елдің құқық қорғау жүйесін реформалаудың құқықтық базасын жасауды көздейтін заң шығару жұмысынан хабардар етті. Кеңес қорытындысында Президент бірқатар нақты тапсырмалар берді. ---------------------------------- Суретті түсіргендер С.БОНДАРЕНКО, Б.ОТАРБАЕВ.