Кеше...

...“МЕКТЕПКЕ ЖОЛ” АКЦИЯСЫ ӨТТІ Баланың бақытты күлкісі көбіне әке мен ана мейірімі мен оларға жасалған қамқорлықпен өлшенеді. Демек, осы бағытта қолға алынған “Мектепке жол” акциясы ауқымында Талдықор­ған қалалық білім бөлімі ма­ңыз­ды шараларды қолға алып, жос­парға сай оқушыларға қайырым­дылық көмек көрсету, оларды жаппай оқуға қамту бағытында рейдтер ұйымдастырып, семи­нарлар өткізіп келеді. Күні кеше осы бағытта бас қосқан арнайы комиссия жетім, жартылай жетім, әлеуметтік жа­ғы­нан аз қамтылған отбасы ба­ла­ларының қажеттілігін шешу мақсатындағы жұмыстарды ор­та­ға салып, ұжымдар мен жеке де­меушілерден жиналған заттарды бөлді. Оқу құралдары, мектеп фор­масына ие болғандар шын қуанды. Биыл шаһардағы 375 бала­ның көмекке зәру екендігі анық­талса, оларды қалталы азаматтар мен кәсіпкерлер өз қамқор­лық­тары­на алған. Осылайша, ұрпақ болаша­ғына жол ашқан акция одан әрі жалғасып, балалардың мерейін өсіріп, ертеңгі күнге де­ген берік сенімін қалыптастыруда. Күмісжан БАЙЖАН. Алматы облысы. ...ҮШІНШІ АУЫСЫМ БАСТАЛДЫ Бурабайдағы “Приозерный” демалыс және сауықтыру орта­лы­ғында жастардың инно­ва­ция­лық-танымдық лагерінің үшін­ші ауысымы жұмысын бас­та­ды. “Нұр Отан” ХДП “Жас Отан” жастар қанаты мен Білім және ғылым министрлігі ұйым­дас­тырған шараның ашылу сал­та­натында Президент Әкімшілі­гі­нің және Ақмола облысы әкімдігінің өкілдері, “Нұр Отан” ХДП хатшысы Қ.Сатыбалды, “Жас Отанның” атқарушы хат­шы­сы Н.Өтешев құттықтау сөз сөйледі. Лагерь биылғы жаз айларын­да 400-ге жуық жасты қабылдап, көптеген танымдық шаралар өт­кізді. Ал, “Отаншыл” деп атала­тын үшінші ауысымның қаты­су­шылары арасында “Жас Отан” жастар қанатының барлық дең­гейдегі атқарушы хатшылары­ның болуы, ел жастарының ал­дында тұрған міндеттерді терең саралауға мүмкіндік береді. Мұнда Байланыс және ақпарат, Ауыл шаруашылығы министр­лік­терінің, Мемлекеттік басқару академиясының, Елбасының ха­лықаралық “Болашақ” стипен­диат­тарының, бизнес өкілдерінің пікір алмасу алаңдары, семинар-тренингтер өткізіледі. Бақберген АМАЛБЕК. Ақмола облысы. ...ҚАМҚОРЛЫҚСЫЗ ҚАЛҒАНДАРҒА ҚАЙЫРЫМДЫЛЫҚ ЖАСАЛДЫ Тұрмысы төмен отбасындағы және ата-анасының қамқорлы­ғын­сыз қалған балаларға оқу құралдары мен қажетті киім-ке­шектер үлестірудің республика­лық акциясына қармақшылық­тар да кеңінен қатысуда. Жосалы кентінің орталық алаңында ұйым­дас­ты­рылған қайырымдылық акция­сын­да 100-ге жуық балаға қо­мақты тарту-таралғылар жасалды. Сондай-ақ, осы шарада “Қызыл Ай” қоғамының облыстық бө­лім­шесі тарапынан 13 оқушыға 550 мың теңге көлемінде қар­жылық көмек көрсетілді. Ата-анасынан айырылған қос бүлдіршінді бауырына басқан ақ жаулықты әже С.Жүнісбаева аудан әкімдігі мен сала бас­шыларына, жекелеген кәсіпкер­лерге ризашылығын білдіріп, аналық ақ батасын берді. Еркін ӘБІЛ. Қызылорда облысы, Қармақшы ауданы.