Мақтануға да, мақтауға да тұратын іс

Қазақстан Республикасының Прези­денті Н.Ә.Назарбаевтың осы жылдың 1-2 желтоқсанында Астана шаһарында Еу­ропадағы қауіпсіздік және ынтымақ­тас­тық ұйымына мүше мемлекеттердің Сам­митін өткізуге байланысты мәлімдемесі ғасыр тоғысындағы тарихи басты жаңа­лықтардың бірі болып қабылданды. ХХ ғасырдың соңғы онжылдығында тәуел­сіз­дікке қол жеткізген Қазақстан ХХІ ғасыр­дың алғашқы онжылдығында үлкен саяси нәтижеге ие болып отыр. Өз дәуірінде Ке­ңестік жүйенің қоршауына  көп­теген істердің көрінбей көлеңкеде қа­лып келгені белгілі. Еліміздің тәуелсіздік жыл­дарындағы қол жеткен жетістіктері хал­қымыздың ардақ тұтатын аталы сөзі “Малымды алсаң да – жанымды алма, жа­нымды алсаң да – арымды алма” де­ген қастерлі сөздің қасиетіне сай келіп тұр. Кезінде мың өліп, мың тірілген хал­қымыз қасиетті қара шаңырағы тәуел­сіз­дікке ие болған соң, түлеген қырандай тү­леп ұшып, қай жағынан болса да асқа­ра­лы істерде де, адами құндылықтар мен ауызбіршілікте де өзгеге өнеге таныта білді. Бұл біздің ұлттық-рухани, елдік егемендігімізді, танымды тәуелсіздігімізді қастерлеудегі құнды қағидаларымыз болып отыр. Ел Президенті Нұрсұлтан Назарбаев ұлылықты ұлықтап, қасиетті істерді қастерлей отырып, алдағы істерді айқындай отырып, болашақты болжай отырып, саналылықты сараптай отырып, өзінің 2010 жылғы “Жаңа онжылдық – жаңа экономикалық өрлеу – жаңа мүм­кіндіктер” атты Қазақстан халқына Жол­дауында елдің ішкі саясаттағы, эконо­микадағы, индустриялық-инновациялық дамудағы, әлеуметтік саладағы, т.б. істе­лінген және істелінетін жоспарларды айқындай келіп, сыртқы саясаттағы істер­ге де маңыз берген еді. Соның басты ұс­та­нымы ЕҚЫҰ-ға төрағалыққа байла­ныс­ты: “...Әлемнің жетекші елдерінің көшбасшылары, беделді халықаралық, экономикалық және гуманитарлық ұйым­дардың басшылары өздерін Қазақстанның досы санайды. Біз мұны мақтаныш етуге тиіспіз!” – деген болатын. Шындығында бұл мақтануға да, мақтауға да тұрарлық іс. Кезінде ақындар “Мақтанса бүгін, мақтансын қазақ, төбесі көкке тимей тұр аз-ақ”, деп жырлағандай, бүгін сол дәрежеге жеткенімізді және кемелденгенімізді ойда ұстап қастерлейік. Әрине, қай істе болсын, үлкен басшылық, көрегенділік қажет. Халқымызда “Мың қосшыдан, бір басшы”, – деген ұлы сөздің растығы өмірде дәлелденгенін көрсететін кезең келді. Қазір жан-жағыңа қарап, төрткүл дүниені ойыңмен түгел шарлап өтсең, Қа­зағымнан да, Қазақстанымнан да, Елба­сынан да артық халықты, жерді, елді, бас­шы­ны көріп тұрғаның жоқ. Бұл артық емес, бұл анық дүние. Сондықтан Елбасы Н.Ә.Назарбаевтың жасаған саяси мәлім­демесін шын жүрегімнен қолдап және қуана отырып Қазақстан халқын ауыз­біршілікке, татулыққа, бірлікке, достыққа шақырамын. Бірлігіміз берік болса, аса ал­майтын асу, алынбайтын қамал болмайды. Ақтөбе өңірі байлығымен қатар, іс­кер­лік жетістіктерге жете отырып, жүзге жуық ұлттар мен ұлыстарды ұядай ұйы­тып, бейбітшілік пен ынтымақтастықты жетілдіріп келеді. Алдағы Астанада бола­тын 56 елдің саммитінің нәтижелі, лайық­ты өтуіне үн қосып, іскерлік танытуға тиіспіз. Келдібай ЕСПАҒАМБЕТОВ, Бейбітшілік және келісім кеңесі Ақтөбе облыстық филиалының төрағасы.

* * *

БҰЛ ЖИЫНДЫ ӘЛЕМ ЕЛДЕРІ ҚАДАҒАЛАЙТЫН БОЛАДЫ

Қазақстанның Еуропадағы қауіпсіздік және ынтымақтастық ұйымына төраға­лық етуі ел беделінің халықаралық аре­на­да артуы екені анық. Және мұның өзі саяси тұлға ретінде Президентіміз Нұр­сұл­тан Назарбаевтың орны ерекше еке­нін көрсетті. Әлемнің айтулы мемлекет­тері­нің басын біріктіретін халықаралық аса беделді ұйымға төрелік айту Қазақ­станға зор міндет жүктеп отыр. Өйткені, қарт құрлықта да, Азияда да шешімін күткен проблемалар қордаланып қалған. Ол бүгінгі уақыттың сипатымен тығыз бай­ланысты. Көптеген саяси қайрат­кер­лер мен ғалымдар айтып жүргендей, мем­лекеттердің, тіпті осы Ұйымға мүше ел­дердің саяси қарым-қатынасында түйт­кілдер де жоқ емес. Басқаны айтпағанда, іргеміздегі өзімізге бауыр ел Қырғыз­стандағы дағдарысқа байланысты ЕҚЫҰ реттейтін мәселе шаш-етектен. Президент Нұрсұлтан Назарбаевтың ЕҚЫҰ Саммитін биылғы жылдың 1-2 желтоқсанында Астана қаласында өткізу туралы мәлімдемесінде айтылған мәсе­ле­лер­ді қазақстандықтар толығымен қол­дайды деп ойлаймын. Біз соғыстан кейін туған ұрпақпыз. Халқымыздың саяси қуғын-сүргін зар­да­бын, одан кейін соғыс салған ауыртпа­лық­ты көргенін, “мың өліп, мың тіріл­ге­нін” ата-анамыздан естіп, оқып-біліп өстік. Соғыс болған жерде қарапайым ха­лық­тың, жазықсыз адамдардың қаны төгіледі. Оны айналамызда болып жатқан оқиғалардан көріп отырмыз. Тәуелсіз Қа­зақстанда ұлт пен ұлыстардың тату-тәтті тұратыны қазір қазақстандық үлгі сана­лып отыр. Ешқандай жасандылығы жоқ, бір атаның балаларындай сыйлас­тық­тың орнағаны, тілі мен дініне, дәстүріне құрметпен қарауы Президент Нұрсұлтан Назарбаев жүргізіп отырған сындарлы, ұлт­тық саясаттың жемісі екенін барлығы да мойындайды. Біздің елдегі ұлттық диас­пора өкілдеріне тілін дамытамын десе де, дінін ұстаймыз десе де еркіндік берілген. ХХІ ғасыр адамзат баласына өз проб­лемаларын ұсынып отыр. Бұл – экология мәселесі. Еуропадағы, Қытайдағы топан су, Ресейдегі құрғақшылық пен өрт, тағы басқа елдер қатты қиналып отырған сти­хия­лық құбылыстар шекараны білмейді. Сонымен қатар ұлтына, жынысына қа­ра­май­тын тағы бір кесепат – нашақорлық пен есірткі бизнесінің қаупі де табиғи қатер­лер­ден кем соқпайды. Бұл барлық мемле­кет­тер­дің күш біріктіруін, ойласып қи­мыл жасауын талап етеді. Қазақ мұн­дай­ды “кемедегінің жаны бір” деп түйген. Сондықтан ЕҚЫҰ жүргізіп отырған жұ­мыстардың ауқымы тек осы Ұйымға мүше мемлекеттерге ғана қатысты емес, жұ­мыр жердің қай түкпіріндегі елдерді де ойландырады. Ұрпақтың дені сау, болашағы айқын, қатерсіз болуы үшін климаттық өзгеріс­терге қарсы қандай жұмыстар жүргізу керек? Бүгін әлем жұртшылығының кө­ңі­лі осыған алаң. Сондықтан Қазақстанда өтетін бұл мәртебелі жиынды тек ЕҚЫҰ-ға мүше елдер ғана емес, дүниежүзі қадағалап қарайтын болады. Онда әлемдік маңызы бар мәселелер ортаға салынады, талқыланады, тұжырымдар жасалады. Бұл, әрине, әр қазақстандық үшін мақ­та­ныш, абырой. Желтоқсан айының ал­ғаш­қы екі күні Қазақстан, Астана қаласы жердің нүктесі сияқты көрінер. Қазақ­станның төрағалығы табысты өтсін, Президент жүргізіп отырған ішкі-сыртқы саясат баянды болсын деп тілеймін. Бағытұр ДӘНДІБАЕВ, Қазақстан халқы Қостанай облыстық ассамблеясы төрағасының орынбасары. Қостанай.

* * *

БӘРІМІЗГЕ ОРТАҚ МЕРЕЙ

Біз теміртаулық металлургтер барша отандастарымыз сияқты Еуропадағы қауіп­сіздік және ынтымақтастық ұйымы­ның Саммиті Астанада өтетін болып ұй­ға­рылуын разылық сезіммен қарсы ал­дық. Бұл еліміздің халықаралық беделі өс­кеніне, мемлекеттер арасындағы түсі­ніс­тікті нығайту жолындағы бастама­лары­ның биік қадірленіп отырғанына нақты айғақ дей аламыз. Аз жылдар ішінде-ақ әлемдік қауым­дастық құрметіне бөленіп, сеніміне ие болу Қазақстан үшін зор мерей әрі мәр­тебе екені талассыз. Бұл ретте Тұңғыш Пре­зидентіміз Н.Ә.Назарбаевтың үлкен жауап­кершілікті абыроймен атқаруға белсенді күш салуы жетістіктерге бастап келе жатқандығын білеміз. Қазақстан маг­ниткасында тұңғыш шойын алы­нуы­ның 50 жылдығына байланысты болған кез­десуде біз Елбасының осы игі мақсат­тағы бастамасына қолдау білдіріп, қос­та­дық. Тыныштық пен бауырмалдық – әр­кімнің бүгінгі тілегі. Соны ор­нық­тыруда көшбасшылық рөлге көтерілген еліміз абыройы асқақтай беретініне сенеміз. ЕҚЫҰ-ның Саммиті соңғы он бір жылдан кейін Астанада өткізілгелі отыруы халықаралық елеулі оқиға болмақтығы хақ. Шетелдік сарапшылардың Қазақ­стан­ның төрағалығы Ұйым жұмысына жаңа леп қосты деген ойларын естіп, біл­ген сайын қуанып қаламыз. Ол бәрімізге ортақ мерей. Соның бірінде ЕҚЫҰ-ның қауіпсіздік мәселелерге байланысты жауапкершілігін Орталық Азияға дейін кеңейтуі Қазақстан арқылы болып отыруы өмір шындығы. Бұл Саммитке қатысушыларды қарсы алатын Астанаға ғана сын емес, ірге­сін­дегі Теміртау, Қарағандыға да сын. Сон­дықтан дайындық іс-шараларынан қалыс қалмауы керек. Елорданың меймандостық құшағы кең болуына барынша көмек көрсетілгені жөн деп ойлаймыз. Жарас АРЫСОВ, Қарағанды металлургиялық комбинатының цех бастығы.

* * *

АЛТЫН ӘРІППЕН ЖАЗЫЛАДЫ

Күні кеше қолыма еліміздің аға басы­лы­мы – “Егемен Қазақстан” газетін алып, Елбасы Нұрсұлтан Әбішұлы На­зарбаевтың Еуропадағы қауіпсіздік және ынтымақтастық ұйымы Саммитін 1-2 желтоқсан күндері Астана қаласында өт­кізу шешімінің қабылдануына байла­ныс­ты Мәлімдемесін оқып, жүрегіме жы­лы­лық ұялаттым. Неге дейсіз ғой? Мәр­те­белі ұйым саммитінің біздің еліміздің бас қаласы – Астанада өтуі Қазақстанды бүкіл әлемге әйгілі етіп, еліміздің эко­но­микалық және демократиялық дамуына соны серпін бермек. Еліміздің тарихында алтын әріппен жазылып қалар осынау тарихи шешім біздің елдің бірлігі мен бірлігін дүниежүзіне паш етіп, ақ жолдан адаспай келе жатқанымызды айғақтады. Елбасы өз мәлімдемесінде: “Төрткүл дүниеге төрелік айтқан Қазақ елі Азия мен ТМД мемлекеттері арасында тұңғыш рет беделді ұйымның Саммитін өткізеді. Қазақ елі бұрын-соңды мұндай биікке жеткен емес” деп еліміздің еңсесін биік­тегеніне жүрекжарды лебізін жеткізеді. Елі­міздің бүкіл әлемге танылуы тікелей Елбасымыздың ересен еңбегінің жемісі. Өзім Сыр елінен болған соң Елбасы­мыздың мәлімдемесінде атап көрсеткен Арал проблемасын шешудегі ЕҚЫҰ-ның рөлін күшейту мақсатын қоюы баршамыздың жүрегімізге жол тауып, көңілімізді қуаныш құшағына бөлеп отыр. Сөз соңында Еуропадағы қауіпсіздік және ынтымақтастық ұйымы Саммитінің Астанада өтуі еліміздің тарихына алтын әріппен жазылып қалатынын тағы да қайталап айтқым бар. Ермекбай ЕРМАНОВ, облыстық мәслихат депутаты. Қызылорда облысы.