Әкім ауыз аштырды

Жамбыл облысының әкімі Қа­нат Бозымбаевтың өңірдегі ал­ғаш­қы ауқымды істерінің бірі облыс орталығындағы Һибатулла ат-Тарази мешітінің жанындағы бас­талмай жатып тасталған медресе құрылысын қолға алудан басталған болатын. Бүгінде бұл игілікті іс ойдағыдай аяқталып келеді. Әрі-бері өткен сайын мүмін мұсыл­ман­дар құрылысшылардың қарқынды істеріне куә болып, “жоқтың түбі жоғалар, бардың түбі оңалар” деген осы екен-ау” деп, іштей риза болып қалады. Жанына иманды жолдас еткен осы әкім енді Рамазан айының алғашқы жұмасын да құр жібермей, Ораза ұстап, ауыз бекіткен ұлттар мен ұлыстардың мүміндерін бір дастарқан басына шақырып, ауыз ашар берді. Бұл ілтипатқа Алладан басқа ешбір тәңір жоқ екеніне және Мұхаммед Алланың елшісі екеніне куәлік еткен мұсылмандар қауымы дән риза болып қалды. Өйт­кені, Мұхаммед (с.а.у.) Пайғам­­барымыз “Рамазан айының басы – мейірім, ортасы – кешірім, аяғы – тозақ отынан азат болу” деген екен. Құдайға шүкір, тәуелсіздік ал­ғалы бері елде тіліміз бен дініміздің керегесі кеңіп, шаңырағы биіктей бас­тады. Босағасы да берік. Ме­шіт­тер мен медреселер көбейіп, намаз оқып, зекет беріп, ораза ұстаған иманды жандар саны да арта түсті. Қаржысы жеткендер Мекке мен Мединеге қажылыққа да баруда. Жәннат есіктері ашылып, тозақ есіктері жабылып, шайтандар шын­жырланған Рамазан айында ауыз ашар беру өте сауапты іс екені белгілі. “Біз, тегіміз – түрік, дініміз – ислам екенін ұмытпауымыз ке­рек” деген Елбасы Нұрсұлтан На­зарбаевтың ғибратты сөзі де осын­дай нығыметтерді құптап, қолдай­тынын көрсетеді. Көсемәлі СӘТТІБАЙҰЛЫ, Жамбыл облысы.