Алғашқы олимпиаданың алауы

Осы күндері Сингапурде І жас­өспірімдер арасында жазғы Олимпия ойындары өтуде. Оның ашылу салтанаты әдеттегідей стадионда емес, Сингапурдың “Марина Бэй” ірі экономикалық ауданында арнайы қоршалған сахнада өтті. Биылғы Олимпиадаға 205 мем­лекеттен 3 мың 594 спортшы қа­ты­суда. Олар спорттың 29 түрі бойын­ша 201 медаль жиынтығын сарапқа салады. Олимпиада кезінде спорт­шылар жас мөлшеріне қарай бөлініп, күш сынасады. Сонымен бірге кей­бір жарыстарда ұл-қыздардың аралас командалары ойнап, Ұлттық Олим­пиялық комитеттерінің өкілдерінен құралған құрлықтық құрамалар ара­сында жарыстар өткізіледі. Олимпиаданың бірінші күні Қа­зақстан спортшылары алғашқы ал­тын жүлдені жеңіп алды. Грек-рим кү­ресінің балуаны, Астанадағы Қажы­мұқан Мұнайтпасұлы атындағы спортта дарынды балаларға арналған республикалық мектеп-интернаттың түлегі Жәнібек Қандыбаев 69 кг. салмақта төрт рет кілемге шығып, жас­өспірімдер Олимпиадасында тұңғыш рет алтын жүлдеге ие болған спортшы атанды. Ал Олимпиаданың алғашқы жүлдесін Қазақстан құрама­сына тағы да осы жарыс түрінен шыққан Ахан Баймағамбетов иеленді. Ол 42 кг. салмақ дәрежесінде қола жүлдені қанағат тұтты. Осы жерде айта кететін нәрсе, грек-рим күре­сінен барлығы бес салмақ бойынша өткен белдесулерде бұрынғы Кеңес Одағы республикалары балуанда­ры­ның басымдылығы байқалып тұрды. Мұнда Қазақстан бір алтын, бір қола, Ресей, Қырғызстан мен Әзірбайжан екі алтын медаль алса, Украина мен Өзбекстан бір күміс және бір қола медальді мойындарына тақты. Олимпиаданың екінші күні суға жүзуден өткен жарысқа Астанадағы Қажымұқан Мұнайтпасұлы атындағы спортта дарынды балаларға арналған республикалық мектеп-интернаттың түлегі Екатерина Руденко, Олимпия­лық даярлау орталығының өкілі Руслан Байманов қатысып, елу метрге арналған жарыста жартылай финалға шыға алмаса, Ал 100 метрге арналған “Брасс” әдісі бойынша өткен бәсе­ке­де Юлия Литвина да жартылай фи­нал­дан аса алмады. Триатлон бә­се­кесінде сынасқан Каролина Соловье­ва 32 спортшының арасында 21-ші болып мәреге жетті. Кеше спорттың осы түрінен Ки­рилл Уваров жарысып, 27 орынға ие болды. Әзірше Олимпиаданың үш кү­ні­нен кейін отандастарымыз жал­пы ко­мандалық есепте 6-шы орында келеді. Ардақ ТОҒЫМОВ,  арнайы “Егемен Қазақстан” газеті үшін – Сингапурден.