Елімізде жаппай полиoмиелитке қарсы иммундау жүргізіледі

Алматыда Республикалық санитарлық-эпидемиологиялық  сараптау және мониторинг ғылыми-практикалық орталығында Денсаулық сақтау министрлігі Мемлекеттік санитарлық-эпидемиологиялық қадағалау комитетінің төрағасы, еліміздің бас мемлекеттік санитарлық дәрігері Кеңес Оспановтың қатысуымен полиомиелитке қарсы иммундау   жайында баспасөз мәслихаты өтті. ДҰҰ-ның балалар қоры сарапшыларының, АҚШ-тың жұқпалы ауруларды бақылау орталығы өкілдері мен жауапты ғалым-мамандардың қатысуымен болған алқалы жиында бас санитарлық дәрігер Қазақстанның барлық аумағында қыркүйектің 6-11-і аралығында 6 жасқа дейінгі балаларды полиомиелитке қарсы иммундау жүргізілетінін мәлімдеді. – Көрші елдерде полиомиелит­пен сырқаттану бойынша эпиде­миялық жағдайдың күрделеніп кетуіне орай, Қазақстанның барлық аумағында қыркүйек айының 6-11 аралығында 6 жасқа дейінгі бала­лар­ды полиомиелитке қарсы қо­сымша бір қайтара жаппай иммун­дау жүргізіледі, – деді Кеңес Оспа­нов. – Вакциналауды ұйымдастыру бойынша іс-шаралар жоспар бой­ынша дайындалуда. Мәселен, 6500 егу пункттерінде 4200 бригада, ал, елді мекендерден алыс жатқан жер­лерде көшпелі 1200-ден аса бригада жұмыс істейтін болады. Аталмыш шараға 8400 дәрігер-фельдшер мен 5700-дей вакцина­тор­лар тартылмақ. Бас санитарлық дәрігердің айту­ын­ша, ең тиімді саналатын вакцина Бельгия елінен сатып алынып, ДДҰ-мен сертификатталған. Бұл им­мундау шарасын жүргізуге мем­лекеттік бюджеттен 64 млн. қара­жат бөлініп, қыркүйек айының 11-не дейін 1 миллион 800 мың баланы егу жоспарланған. Жалпы вакциналау егу арқылы емес, дәмі тәтті сұйық затты бала­ның аузына тамызу арқылы жүзеге асырылады. Сондай-ақ, бүгінге дейін иммундау жүргізу бойынша дәрігерлер арасында арнайы семи­нарлар, дәрістер, дөңгелек үстел­дер, түсіндіру,   дайындық жаттығу жұмыстары жүргізілген. Ал ДҰҰ балалар қорының қолдауымен 630 мың баспа материалдары, бук­леттер мен парақшалар дайын­далған. Жылына еліміздің шекарасы бойынша 8 млн. 100 мың шетел­дік­тер өтетінін, әсіресе, полиомиелит орын алған Тәжікстаннан Қазақ­станға 25682 адам өткенін жеткізген Кеңес Оспанов бұл аурудың кіру қаупі бар екендігіне тоқтала келіп,   полиомиелит мүгедектікке, өлімге соқтыратындықтан  барлық ата-аналарды бұл шараға жауапкер­ші­лікпен қарауға шақырды. Гүлзейнеп СӘДІРҚЫЗЫ.