Үркер ауған шақ

Футбол біріншілігінде командаларды екі бөлікке бөлді Қазақстанның кезекті XVІІІ чемпионаты тамыздың 14-і күні бір белестен асты. Бұл күні 22-турдың ойындарын ойнаған командалар үшін бұдан арғы жол екі бөлек тармаққа айырылды. Біріншіліктегі үркер ауған шақтай болып сезілетін осы кезеңнен бастап 12 клубтың бір жартысы күн астынан күміс шуағы мол орын алуға ұмтылып, медаль­дар­дың түсі мен салмағы үшін кү­реске кіріссе, екінші жартысы келер жылдың қамын осы күннен жасап, чемпионаттың жоғары тобында қала беру үшін ақ тер, көк терге көмілгелі тұр. Біріншіліктің бірінші бөлігі болып саналатын алғашқы екі айналымның соңғы туры кім­нің қай бағытты бетке ұстай­ты­нын анықтады. Мұнда алғашқы топқа енген 5 команда қата­рында кімдер бар екені бұған дейін белгілі болып тұрса, ал­тыншы “бақытты билетті” кімнің суыратыны әлі беймәлім еді. Бұл орынға бір-бірінен екі ұпайдай ғана айырымы бар “Атырау” және Талдықор­ған­ның “Жетісу” командалары үм­іт­ті болатын. Сол екі ұпай ар­тықшылығына ие атыраулықтар осы күні өз алаңында топ басына таласушылар сапына ұмтылып келе жатқан “Ақтөбені” қабылдады да, жеті өзенді өлкенің өрендері Қара­ғандыда “Шахтерге” қарсы шықты. Бір қызығы, бұл екі ойында да қонақтар бірінші болып есеп ашты. Жағдайдың бұлайша басталуы, әлбетте, мұнайлы атыраптың аяқдоп шеберлеріне ұнай қойған жоқ. Сондықтан атыраулықтар “Ақтөбе” сапынан 32 минөтте Смақовтың ав­тор­лығымен соғылған голынан соң бір минөт өтер-өтпесте таразы басын теңестіріп үлгерді. Себебі, бұл сәтте Қарағанды стадионындағы есеп те 1:1 болып үлгерген-тін. Онда жеті­су­лық Мужиковтың 2-минөтте соқ­қан голына кеншілер 24-минөтте Джидичтің белсенділігімен жауап қай­тарған. Ақырында алтылық аясы­на енуге құштар болған бұл екі ко­ман­да да қарсыластар қақпасына соң­ғы жеңіс добын түсіріп, есепті 2:1-ге жеткізіп тоқтады. Осы есеп­тердің өзі атыраулықтардың алдыңғы лекте қала беретінін біржола айғақтап берді. Турдағы басқа ойындар да аса тар­тысты өтті. Солардың қатарына Та­раздағы ойынды жатқызуға бола­ды. Онда жергілікті “Тараз” Қос­танайдың “Тобылын” қабылдады. Бұған дейін турнир кестесінде 44 ұпаймен жеке-дара топ бастап келген қостанайлықтар бұл кезд­е­судің бас құрамына Петухов, Ба­қаев, Нұрғалиев, Юрин, Ирисметов сынды белді ойыншыларын шығар­ға­н жоқ. Бұған қарағанда, алаң ие­лерінің құрамы нағыз жауынгерлік сипатта дерліктей еді. Осының да әсері болды ма, әлде басқалай се­бе­бі бар ма, әйтеуір матчтың бі­рін­ші таймында чемпионаттың көш­бас­шысы “Тобыл” емес, “Тараз” си­­­яқ­ты болып көрінді. Кездесудің осы кезеңінде алаң иелері мейман­дар қақпасын 8 мәрте нысанаға алса, соның 5-уі қақпа шеңберінің ауқымына туралай жетті. Ал қ­о­нақ­тар бұған бір ғана соққымен жауап қайтара білді. Обалына не керек, тараздықтар лидер қақпасына гол соғуға соншалықты құштар болды. Бірақ, ол ниет жүзеге аса қоймады. Алаң иелері шаршап қалды ма, болмаса қонақтар сапына тыңнан мық­ты ойыншылар қосылғаны ық­пал жасады ма, екінші таймда ой­ын­ның сипаты мүлдем өзгеріп сала берді. Енді меймандар алаң иеле­рінің қақпасын жиі торуыл­дауға шықты. Ақырында қос­та­най­лық­тар капитаны Жұ­мас­қалиев Малышевтің аяғы ас­ты­на әдемі пас шығарып беріп еді, ол мүлт кете қоймады. Бұл кез­де матч­тың бітуіне 6 ми­нөт­тей ғана уа­қыт қалған. Осы ес­еп, алаң иелерінің соңғы ыш­қы­нысына қарамастан, ойын со­ңына дейін өзгермеді. Сөй­тіп, жалғыз гол кездесу тағды­рын қонақтардың пайдасына шешіп берді. Бұл күні қалған командалар арасындағы ойындар мынадай есептермен аяқталды: “Ер­тіс” (Павлодар) – “Ақжайық” (Ор­ал) 1:0, “Оқжетпес” (Көкше­тау) – “Ордабасы” (Шымкент) 3:2, “Қайрат” (Алматы) – “Локомотив” (Астана) 2:2. Мергендер: Нұрбол Жұмас­қа­лиев (Тобыл) – 10, Ұлықбек Ба­қа­ев (Тобыл) – 10 (3), Глеб Мальцев (Ертіс) – 9, Георгий Даскалов (Ер­тіс) – 9 (1), Игорь Бугаев (Локо­мо­тив) – 9(2). Чемпионаттың келесі кезеңі 22 тамыз күні басталады. Бұл күні 1-6 орындар үшін “Тобыл” – “Аты­рау”, “Ертіс” –“Локомотив”, “Ақ­тө­бе” – “Шахтер”, 7-12 орындар үшін “Жетісу” – “Оқжетпес”, “Ор­да­басы” – “Ақжайық”, “Қай­рат” – “Тараз” командалары ойнайды. Қорытынды турнир кестесі Ор.         Командалар         О             Ұ             Т             Ж            Доп        Ұп 1              “Тобыл”               22            14            5              3              37-15      47 2              “Ертіс”  22            12            7              3              30-16      43 3              “Ақтөбе”              22            11            4              7              32-22      37 4              “Шахтер”              22            11            4              7              28-19      37 5              “Локомотив”      22            11            3              8              33-21      36 6              “Атырау”             22            11            3              8              29-26      36 7              “Жетісу”              22            9              7              6              22-16      34 8              “Ордабасы”         22            8              6              8              20-20      30 9              “Қайрат”              22            4              8              10            11-22      20 10            “Тараз” 22            4              6              12            21-33      18 11            “Ақжайық”          22            3              5              14            19-43      14 12            “Оқжетпес”         22            3              4              15            16-45      13