Елорда еңселене түспек

Мемлекет басшысы Нұрсұлтан Назарбаев “Астана қаласының бас жоспары ғылыми-зерттеу институты” МКК-да болды, деп хабарлады Қазақстан Республикасы Президентінің баспасөз қызметі. Астананың бас жоспары кәсіпорнында елорданы одан әр дамыту, қаланың заманауи коммуналдық, әлеуметтік және көлік инфрақұрылымын қа­лып­тастыру мәселелері талқ­ы­ланды. Президентке қаланың жаңа нысандарының – медиа-ор­талықтың, Мектеп оқушылары шығармашылық сарайының, Қазақстан тарихы мұражайы­ның, жабық тұрғын үй кеше­нінің жобалары танысты­рылды. Жаңа медиа-орталықта өңір­дегі ең үлкен әрі қазіргі заман талаптарына толықтай сай келетін телевизиялық ке­шен орналасады. Жалпы аумағы 45 мың шаршы метрден астам Оқушылар сарайында плане­тарий, мұражай, кітап­ха­на, спорт және би залдары мен өзге де бөлмелер орналасады. Қазақстан тарихы мұражайы жаңа алаңға жақын жерде, “Қазақ Елі” монументіне таяу орын тебеді. Ғимарат жобасы модерн стилінде, бірақ қа­зақ­тың ұлттық нақышы ескеріліп жасалған. Көп кешікпей Астана қала­сының ең бірегей құрылыс­тарының бірі жабық кешен болмақ – орасан зор күмбездің астында толық инфрақұры­лымы бар бүтін бір тұрғын шағын аудан орналасады. Жыл мезгі­лінің кез келген уақытын­да бұл тұрғын кешенде тұрақты ауа температурасы сақталады. Жоба 10 мың тұрғынға есеп­телген. Президентке, сондай-ақ тазарту құрылыстарын қайта құру және Талдыкөлдегі ағын сулар жинақтаушысын жою қарастырылған “Астана қала­сында қайта қалпына келті­рі­ле­тін “Талдыкөл” ағын сулар жинақтаушысын жою” жобасы да таныстырылды. Суретті түсіргендер С.БОНДАРЕНКО, Б.ОТАРБАЕВ.