Қарымта кездесуден күтетініміз көп

Бейсенбі күні “Ақтөбе” Голландияның “АЗ” ко­­ман­дасымен футболдан Еуропа лигасынан топтық тур­ниріне жолдама беретін алғашқы іріктеу ойынын өткізді. Матчтың қорытынды есебі 0:2 болып Алкмар Занстерн қаласының ойыншыларының пайдасына шешілді. Кездесуде ақтөбеліктердің қақпасына доптар ойынның бірінші жартысында соғылды. Оның авторлары болып 20-шы минөтте доп соққан Хол­ман мен жеті минөттен кейін есепті есе­леген Верн­блум атанды. Бұл матчта “Ақтөбе” сапында Мұрат Тілешев, Иван Перич, Марат Хайруллин, Ален Бо­но, Халифа Ба сияқты ойыншылар сары қағаздарға байланысты ой­наған жоқ. Тағы екі футболшымыз Мақсат Құр­машов пен Конс­тантин Голоской ден­сау­лығына байланысты алаңға шыға алмады. Матч­та “Ақтөбе” бірінші таймда жеңілсе де ойынның екінші жартысында алаң иелеріне есе жібермей ойнады. Осы күні Ресейдің Новосібір қаласының “Сі­бір” командасы сенсация жасады. Өз алаңында Гол­ландияның 13 дүркін чемпионы ПСВ “Эйнд­ховен” клубын 1:0 есебімен жеңді. Голды сібір­лік­тер ойынның негізгі уақыты бітуіне байланысты берілген қосымша 2 минөтте соқты.