Қазақ боксының атасына құрмет

Осы күндері Ақтау қаласында қазақ боксының атасы, тұңғыш қазақстандық спорт шебері Шоқыр Бөлтекұлын еске алуға арналған V дәстүрлі халық­аралық турнир өтуде. Турнирдің бас төрешісі қызметін Туризм және спорт министрлігі Спорт істері жөніндегі коми­те­тінің бұйрығымен тағайындалған Серік Әбдінәлиев атқаруда. Қазақстан Бокс федерациясының шешімімен был­­тырдан бастап Шоқыр Бөлтекұлы атындағы дәс­түрлі халықаралық турнирдің жеңімпаздары Қазақ­стан Республикасының спорт шебері атағына ие болады. Шоқыр Бөлтекұлы 1916 жылы Маңғыстау об­лысы Жармыш ауылының маңында Сарқауақ де­­ген жерде дүниеге келген. Бокспен студент кезінде шұ­ғылдана бастаған. Отызыншы жылдардағы аша­р­шы­лық, аласапыран тұста Форт-Шевченко қала­сын­дағы жетімдер үйінде оқып, орта мектепті біті­реді. Ол – 1936 жылы қазақ жерінде әуесқой боксты үйретуді алғашқы болып қолға алған ұстаз. Қазақ боксының атасы атанған Шоқыр ағамыз – Қазақстан Республикасының еңбек сіңірген жаттықтырушысы, КСРО спорт шебері атанған тұңғыш қазақ. 1937 жылы Ш.Бөлтекұлының басшылығымен бокстан Алматы қаласының ресми біріншілігі өтті. Оған 50 спортшы қатысқан. Шоқыр Бөлтекұлы Ұлы Отан соғысына қатысып, 1944 жылы жара­қа­тына байланысты елге оралады. 1947 жылы Мәс­кеу­де өткен Кеңес одағының біріншілігіне Қазақ елі­нің құрама командасын Ш.Бөлтекұлы дайындап, бастап алып барды. Оның мектебінен Мақсұт Омаров, Әбдісалан Нұрмаханов, Серік Әбінәлиев, Виктор және Владимир Каримовтер, Иосиф Гильдин, Асқар Құлыбаев секілді талантты шәкірттер тәрбиеленіп шықты. Биыл қазақ боксының атасы атанған жерле­сі­міз Шоқыр Бөлтекұлы мен оның зайыбы, елімізге белгілі әртіс, тұңғыш балерина бишісі Нұр­­сұлу Тапалованың Алматыдағы Кеңсай қау­ымындағы бейітіне маңғыстаулық кәсіпкерлердің қолдауымен ескерткіш тас қойылды. Дастан КЕНЖАЛИН.