Ауыл шаруашылығын мемлекеттік қолдау жалғасады

Елбасы Нұрсұлтан Назарбаев екі күндік сапармен Қостанай облысына келді Қостанайға кеше түстен кейін келген Елбасы Нұрсұлтан Назар­баев “Қостанай ұн комбинаты” акционерлік қоғамындағы макарон фабрикасының ашылу салтанаты­на қатысты. Мемлекет басшысы ірі өндірістің тетігін іске қосты. Ма­карон фабрикасы Қостанай облысында жылдың екінші жар­тысында жүзеге асуға тиісті бес инвестициялық жобаның бірі болып табылады. 1 681 миллион тең­ге қаржымен біткен кәсіпорын­ның қуаты да таңқалдырғандай. Фабрика сағатына 4200 кило­грамм, жылына 30 000 тонна ма­карон шығарады. Инвестициялық қаржы көзі негізінен “ҚазАгро” акционерлік қоғамынан алынды, ал оның 15 пайызын “Астық ин­дустриясы” компаниясы өзі қосты. Құрылысы былтыр жыл аяғында басталған ірі өндіріс кәсіпорны үстіміздегі жылдың үшінші тоқ­санында пайдалануға берілуі тиіс бо­латын. Міне, жыл тәулігіне жет­пей ол ел игілігіне айналып үлгерді. Бұл – “Астық индустриясы” ком­паниясының төртінші макарон фабрикасы. Мұнда Италиядан шы­ғарылған “PAVAN” макарон желісі орнатылды. Ол республикамыз ғана емес, Орталық Азиядағы макарон өндіретін ең ірі кәсіпорын болып саналады. Қостанай ұн комбинаты мен макарон фабрикасынан шығарылатын “Корона” ұны мен макаронының сапасы елімізбен қатар, сырт жерлерге де белгілі. Қостанайдың құрамында протеині көп бағалы бидайынан италиялық үздік жабдықпен шығарылған ма­каронның сапасы қандай бәсекеде де алдына қара салмайды. Бұған дейін астық пен сапалы ұн өндіруде көшбасшыға айналған компания енді сапалы макарон өнімдерімен осы деңгейден көрінбек. “Қазақ­станда жасалған” деген брендпен ұнның 35 пайызын, макаронның 5 пайызын экспортқа шығарады. Қазақстанның жоғары сапалы ұны мен макарон өнімдеріне Ресейден, Тәжікстан мен Ауғанстаннан, Қытай мен Моңғолиядан, Түркі­мен­станнан, Грузиядан сұраныс артып отыр. Жаңа фабрика 80 адамға жұмыс орнын ұсынды. Елбасы Нұрсұлтан Назарбаев фабрика жұмысшылары­мен кездесті. – Мемлекет ауыл шаруашылы­ғы­на, аграрлық секторға үлкен қол­дау жасап отыр. Ет пен ұн, сүтті ұқсату кәсіпорындарын салуда. Бұл мол­шылыққа бастайды, айлық жал­ақы өседі, әлеуметтік сала нығаяды. Ауыл шаруашылығына 225 мил­лиард теңге бөлінді. Жо­ғары сапа­лы тұқым, тыңайтқыш пен герби­цидтер үшін субсидия берілді. Биыл бар жерде ыстық, қуаңшы­лық болып тұр. Адамдар аянбай еңбек етіп жатыр. Мем­лекет қол­дауы­ның арқасында ал­қаптарда қуатты техникалар, озық техно­ло­гиялар пайдаланылады. Біз биыл қиын жыл болғанмен де 14-15 мил­лион тонна астық жи­наймыз. Оның 7 миллион тоннасы қорға қалады, – деді Нұрсұлтан Назарбаев. Қостанай облысындағы ауыл шаруашылығында жыл басынан бері өндірілген жалпы өнімнің көлемі 60865 миллион теңгені құра­ды. Физикалық көлем индексі 100 пайыз болды. 2010-2015 жылдың ара­сында облыста 17 инвестиция­лық жоба жүзеге аспақ. Соның ішін­де ауыл шаруа­шылығында атқарылар жұмыс­тардың үлесі де қомақты болмақ. Биылғы жылдың қуаңшылық болуы қостанайлық диқандарға да оңай болған жоқ. Дегенмен, астық жинау науқаны бұл күнде үлкен ыждағаттылықпен жүруде. Сапалы ұн мен дәмді макаронға жұм­салатын алтын астықты жинауға биыл техника 99 пайыз дайын­далды. Қазақстанның экономикасы ырғақты дамып келеді. Президент ауыл шаруашылығына мемлекеттік қолдау бола береді деді. Бірақ ел іргесінің берік болуын Нұрсұлтан Әбішұлы фабрика ұжымымен кездесуде Қазақстандағы бейбіт өмір­мен және халықтар досты­ғымен байланыстырды. Адамдар­дың барлығы достықта, бір-біріне деген сеніммен өмір сүреді. Тату өмір мен бірлік Қазақстан ұстанып отырған саясаттың басты нысанасы екенін айтты Елбасы. – Жылдан жылға жағдайымыз жақсарып келеді. Макарон фаб­ри­касынан ж­ұмыс орнымды таптым. Мұнда барлығы да компью­тер­лендірілген. Жұмысты баяғыдай шаңның астында емес, ақ желең­мен жүріп атқарамыз. Айлық жала­қым да отбасымды асырауға же­теді. Ал біздің кәсіпорын өндірген макаронның түсіне қарап тойған­дай­сың. Дәмділіге де, сапасы да кімге де болса ұнайды. Осының бар­лығы да Қазақстанның эконо­ми­калық дамуының, Президентіміз Нұрсұлтан Назарбаев жүргізіп отырған сындарлы саясаттың арқа­сы. Жұмысымыз бар, тамағымыз тоқ, көйлегіміз көк дегендей, жақ­сы тұрмыста тұрамыз. Мұнан артық адамға не керек? Еліміз, жеріміз, Елбасымыз аман болсын. Нұрсұл­тан Әбішұлымен кездесу маған ыстық әсер қалдырды, – деді ма­карон фабрикасының жұмысшысы Виктор Воронцев. Макарон фабрикасының ашы­лу салтанатында Елбасымен бірге       облыс әкімі Сергей Кулагин, “ҚазАгро” АҚ басқармасының төрағасы Асылжан Мамытбеков, Astana Grup президенті Нұрлан Смағұлов болды. Нұрсұлтан Назар­баевтың Қостанай облы­сына сапары бүгін одан әрі жалғасады. Нәзира ЖӘРІМБЕТОВА. Қостанай. ---------------------------------- Суреттерді түсірген Жұматай КӘКІМЖАНОВ.