Бірыңғай интернет кеңістігі болады

Қазақстан Республикасының Байланыс және ақпарат министрі Асқар Жұмағалиев Қазнетті дамыту жөнінде  кеңес өткізді. Оған Байланыс және ақпарат министрлігінің, “Қазконтент” АҚ-тың өкілдері және “Қазақстан Интернет ассоциациясы” ЗТБ мү­шелері қатысты. Кездесу бары­сын­да Қазақстанда хостингті, пирингтік қатынастарды, элек­трон­дық коммерцияны дамыту жағ­дайын жақсартуға қатысты мәселелер талқыланды. Еске салатын болсақ, хостингті дамыту мәселесі маусымдағы кез­десуде көтерілген болатын. Онда “Қазконтент” АҚ “Қазтелеком” АҚ желілеріне жеңілдетілген қолже­тім­ді хостинг-алаңдарын қамтамасыз ету, сондай-ақ “мегалайнерлер” үшін олардың ресурстарын “ішкі” етіп жасауды ұсынған болатын. Кездесу барысында “Қазтеле­ком” АҚ коммерциялық директоры Асқар Есеркегенов, “Интернет-трафикпен алмасу орталығы” қауымдастығына кіретін ком­па­ниялардың алаңдарында орналас­қан абоненттерге әлеуметтік пай­да­сы бар сайттарға тегін кіруге мүм­кіндік беру дайындығын хабарлады. Баламалы хостинг алаңдары өкілдерінің пікірі бойынша, “Қа­зақтелеком” ұсынысы – Қазнетті дамыту ісіндегі алға тағы бір қадам.  Министр мүдделі тараптарға оның іске асырылуын созбауды және ұсы­нысты “сынақтан істе өткізу” үшін қанатқақты сайттарды жедел анықтауды тапсырды. “Қазконтент” АҚ төрағасы Азамат Омаров “Қазақстандық бір­ыңғай интернет-кеңістік құру” туралы және оған басқа рынок ойыншыларын қосу перспек­тива­лары туралы келісімге Алма ТВ, СТС және Базис-телеком компа­ния­ла­ры ағымдағы жылдың 16 та­мызында қол қойғаны туралы хабарлады. Мәжілістің аясында Асқар Жұ­мағалиев “е-коммерцияны дамыту, қазақстандық экономиканы ре­формалаудың, әлемдік экономикаға ықпалдастырудың және бәсекеге қабілеттілігін арттырудың қуатты және тиімді құралдарының бірі бо­луы мүмкін”, деді. “AWARD.kz ұлттық интернет-сыйлық” қоғамдық қорының ди­рек­торы Константин Горжанкиннің сөзінше, “Интернет-пайдаланушы­лар үшін электрондық коммер­ция­ны дамыту – бұл бәрінен бұрын жаһандық таңдау, ұсыныстарды жыл­дам салыстырудың мүм­кін­ші­лігі, операцияларды жүзеге асы­ру­дың және бағаларды төмендетудің қолайлылығы”. Байланыс және ақпарат ми­нистр­лігінің бас­шы­сы хабар­ла­ған­дай, бүгінгі күні министрлік осы мә­селеге көп көңіл бөлуде. Құрыл­ған “электрондық үкіметтің төлем шлюзінің” арқа­сында бүгінде пор­тал арқылы аза­маттар кейбір қыз­мет­терге тапсы­рыс беріп, салық­тарды төлей ала­ды. Сонымен қатар министр он­лайн­да төлеуге болатын сервистер мен қызметтердің саны үнемі артатынын атап өтті. Интернет-дүкендерге қазақстан­дықтардың сенімін арттыру үшін кездесудің барысында “Сенімді дүкен” қауымдастығын құру туралы ұсыныс айтылды. Қауымдастықтың негізгі рөлі – электрондық ком­мерция саласына беделді сарапшы­ларды тарту арқылы барлық қазақстандық Интернет-дүкендерді бағалау. Асқар Жұмағалиев министрлік отандық интернет-дүкендерге қа­зақстандықтардың сенімін артты­руға бағытталған бастамаларды қолдауға дайын екендігін айтып, өз сөзін қорытындылады.