Үлескерлердің үлкен қуанышы

“Самұрық-Қазына” ұлттық әл-ауқат қоры, “Қазкоммерц­банк” және “Global Buіldіng Contract” жобалау компаниясының әріп­тестігі нәтижесінде республикадағы ең үлкен шаһар – Алма­ты қаласында тұратын үлескерлердің үміті ақталуда. Со­ның нәтижесінде кеше Алматы қаласындағы “Үштөбе” тұрғын үй кешені пайдалануға беріліп, 92 үлескер өздеріне тиесілі пә­терлеріне ие болды. “Үштөбе” тұрғын үй кешенін ашу салтана­ты­на Алматы қаласы әкімінің орынбасары Виктор Долженков қатысып, сөз сөйледі. Үлескерлерге көптен күткен пәтер кілт­те­рін тапсырған басшы, оларды жаңа қоныстарымен құт­тық­та­ды. Қала басшысының орынбасары жиналғандарға сонымен қа­тар қалалық әкімдіктің “Самұрық-Қазына” ұлттық әл-ауқат қо­рымен бірлесуі арқылы ауқымды тұрғын үй құрылысына қа­тыс­ты күрделі мәселелердің өз шешімін тапқандығын атап айтты. Жаңадан пайдалануға берілген сәулетті де сәнді әрі еңселі “Үш­төбе” тұрғын үй кешені он алты қабатты екі ғимараттан және оған қоса коммерциялық және сауда алаңдарынан тұрады. Сонымен қатар, көпшілік назарын аударар­лық­тай тұрғын үй кешенінің тұр­ғындары сексенге жуық авто­көлікке есептелінген автопаркингті де пайдалана алады.  “Үштөбе” тұр­ғын үй кешенінің жалпы аума­ғы 22.606 шаршы метрді құрайды. Сөз реті келгенде айта кететін тағы бір мәселе – “Қуат” кор­по­рациясы” АҚ-тың күрделі қиын­дықтарға тап болған нысан­дары­ның бірі – “Үштөбе” тұрғын үй кешенінің құрылысын толықтай аяқтауға қажетті 1,255 миллион теңге көлеміндегі қаражатты “Қаз­ком­мерцбанк” “Стресті активтер қоры” АҚ бөлген жиырма мил­лиард теңге есебінен іске асырды. “Үштөбе” тұрғын үй кешені “Қуат” корпорациясының “Самұ­рық-Қазына” ҰӘҚ-пен Астана және Алматы әкімдіктері арасында өткен жылдың мамырында қа­был­данған меморандумға сәйкес са­лы­нып бітуі тиіс, құрылысы аяқ­талмаған жеті тұрғын үй кешен­де­рінің бірі екендігін атап айту қа­жет. Құрылысты қаржыландыру­дың жалпы көлемі – 54 миллиард теңге. Қазкоммерцбанктің атқару­шы директоры Мағжан Әуезовтің айтуынша, “Үштөбе” тұрғын үй кешені құрылысының аяқталуы оған қатысып, өз үлесін қосқан бар­лық тараптардың жоғары жауап­кершілікпен және ұйым­шылдықпен еңбек етуінің нәти­жесі екендігі сөзсіз. – Сондықтан келешекте де, міне, осындай ұтымды тәжірибеге сүйеніп өзге де нысандардың белгіленген мерзімде және сапалы аяқталатындығына сенім артуға болады. Шын мәнісінде де, Алма­ты қаласындағы тұрғын үй құры­лыстарын мерзімінде аяқтаудың маңыздылығы жоғары. Соған орай мемлекет қаржысының өз мақса­тынан ауытқымай жұмсалуын, ал нысанның белгіленген мерзімде өткізілуін және оның өз құнынан аспауын бақылау ең басты мақ­сатқа айналды,– дейді Мағжан Мұратұлы. Тағы бір ескере кететін жағдай, Қазкоммерцбанктің бұл бағыттағы қадамы құптарлықтай. Мәселен, оның қаржыландыруымен өткен 2009 жылы алты тұрғын үй кешенінің құрылысы аяқталды. Ал, олардың бесеуі – Алматыда, қалған біреуі Астанада орналасқан. Осын­дай игі де ықпалды жұмыстардың нәтижесінде бір мыңға жуық үлескер жаңа баспанаға ие болып, қоныс тойын тойлады. “Үштөбе” тұрғын үй кешенін пайдалануға бе­руде іскерлікпен және біліктілігімен ерекшеленген “Global Buіldіng Contract” компаниясы жобалары назар аударарлықтай. Компания  оңтүстік астананың “Сайран” ме­га­ауданында екінші, жиырма­сын­шы және 42 мен 46-шы аудан­дар­ды, ал Астана қаласында “Гранд Алатау” тұрғын үй кешенінің 2 және 4 нысанын аяқтау үшін құрылған. Сала басшыларының айтуынша, үлескерлер мәселесін шешу бағы­тындағы іс-шаралар одан әрі же­тілдірілуде.  “Global Buіldіng Con­tract” жобалау компаниясы қада­ға­лау кеңесінің төрағасы Мұхит Әзір­баевтың пікірінше келесі 2011 жылы үлескерлер ісін жеделдетіп, бұл бағытта нақты нәтижелерге қол жет­пек. Сөйтіп, қаладағы ең күр­де­лі нысандар құрылысы аяқтал­мақ. Олардың арасында “Сайран” ауданындағы үш нысан да бар.  Жаңа баспанамен қамтамасыз етуде олардың әлеуметтік жағдайының жан-жақты тексерілуінің қажеттілігі зор. Басты түйін сол, құрылыс нысандарын тұрақты және жүйелі түрде қаржыландыру  табыс кепілі болмақ. Бақыт БАЛҒАРИНА. Алматы. ---------------------------------- Суреттерді түсірген Берсінбек СӘРСЕНОВ.