Әлем өткен аптада

РЕФОРМА КҮШІНЕ ЕНДІ Франция парламентінің сена­ты үкімет ұсынған зейнеткерлік реформасын бекітті. Оны қолдап 177 сенатор дауыс берсе, қарсы болғандар – 151. Он адам қалыс қалған. Бұл мәселені талқылау 143 сағатқа созылыпты. Енді француз­дар зейнетке 62 жастан шығатын болады. Заң бекігенімен, оған қарсылар күресін тоқтатар емес. Кәсіподақ басшылығы қарашада да жалпы ұлттық қарсылық акциясын өткізуді жоспарлап отыр. БХУТТОНЫ ӨЛТІРГЕН КІМ? Бұл сұраққа енді ғана жауап бе­ріліп отыр. Оны Пәкстандағы “Тех­рик-э-талибан” деп аталатын радикалдық топ жүзеге асырыпты. Қастандықты топ жетекшісі Бай­тулла Мехсуд деген ойластырған екен. Пәкстанның бұрынғы премь­­ер-министрі Беназир Бхуттоға қарсы қастандық 2007 жылғы 27 желтоқсанда жасалған еді. Тірі болғанда, президент сайлауында Бхуттоның жеңіп шығатыны күмәнсіз еді. Қазіргі президент Зардаридің жеңісі де оның жұбайы Бхуттоның беделі арқылы келгенін жұрт мойындайды. БЕРГЕНДІ АЛҒАН ЖӨН АҚШ мемлекеттік департамен­тінің өкілі Филип Кроули мәлімдеме жасап, Иран үкіметінің Ауғанстан президенті әкімшілігіне айтарлықтай мөлшерде қолма-қол ақша бергенін айыптаумен қатар, оған барғаны үшін ауған басшы­лығына да өкпе айтқан еді. Президент Хамид Карзай бұ­ған саса қойған жоқ, алғандарын растады, оған қоса АҚШ-тың өзі­нен де осылайша қаржы алғанын айтты. Жақсы көршілік ниетпен берген көмектен бас тартпай­тынын да аңғартты. ШИИТТЕР КЕЛІСПЕЙДІ Сыртқы жаудан гөрі Иракта ішкі діни қайшылық әлдеқайда қауіпті. Исламның екі тармағы – сүниттер мен шииттер әрқашан бір-біріне қарсы әрекет жасап келеді. Кешегі Саддам Хусейннің заманында сүниттер үстем болса, қазір керісінше, билік шииттердің қолында. Аралары араз. Сауд Арабиясы екі жақты бі­тістірмек болып, келісім конфе­рен­циясын өткізуді ұсынған еді, бірақ оны шииттер қабылдамады. ЖЕМҚОРЛЫҚ АЗ ЕЛДЕР БАР Халықаралық үкіметтік емес Transparency Іnternatіonal ұйымы әлем елдеріндегі сыбайлас жемқор­лық жөніндегі зерттеулері бойынша қай елде бұл кесапаттың қанша­лықты белең алғанын жариялады. Негізінен бұл дамыған елдерде аздау екен. Ең аз деген он елдің қатарына Дания, Жаңа Зеландия, Сингапур, Финляндия, Шведия, Канада, Нидерланды, Австралия және Швейцария кіреді екен. ЖҰТ ЖАЛҚЫ БОЛМАЙДЫ Индонезия халқы қатарынан үш апатқа кезікті. Алдымен өткен аптаның сейсенбісіне қараған түн­де Суматра аралында қатты жер сілкінісінен біраз үй қираса, оған қоса Ментаваи аралында жанартау атқылап, одан пайда болған би­іктігі үш метрлік цунами жолында кезіккенді талқандап кетті. Дүние-мүліктің қирап, опат болғаны өз алдына, адам шығыны да айтарлықтай. Ол барған сайын көбейіп келеді. Соңғы деректер 450 деген цифрды алға тосады. ҚАНІШЕРДІҢ ІЗІ ЖОҚ Сербия үкіметі босниялық серб­­тер армиясының бұрынғы ко­мандирі Ратко Младичті ұстап бер­ген немесе қайда жүргенін көр­сеткен адамға 13,8 миллион дол­лар сыйақы беретінін хабарлады. Младич – Босниядағы соғыс кезінде өзінің қандас, бірақ діні бөлек бауырларын аяусыз қырған қанішер. Әсіресе, Сребреница қа­ласында бір мезгілде 8 мың мұ­сыл­манды қырғанын тарих ұмыт­­пайды. Оны соттау үшін Гаагадағы халықаралық трибунал ұстап беруді талап етіп отыр. Алғашында ол Сербияда жартылай ғана жа­сырынып жүрді. Бұл үшін Еу­ро­палық қауымдастық Сербияны айыптап қана қоймай, бұл елді өз қатарына кіргізбейтінін мәлімдеді. Сол Еуроодаққа кіру үшін енді Младичті ұстап бермек болғанда, оның ізі суып қалып отыр. АЗАМАТТЫ АЗА ТҰТТЫ Аргентинаның бұрынғы президенті Нестор Киршнердің қайтыс болуына байланысты бұл елде футбол жарыстарын өткізуге тыйым жасап, ел аза тұтты. Бұл азаматты аргентиналықтар ерекше қадірлейтін. Соның арқа­сында оның әйелі Кристина Кирш­­­­нер де президент болып сай­ланған еді. Ал алдағы жылы оның президенттік мерзімі біткен соң, Нестор Киршнердің өзі қайтадан сайлауға түспек еді. Және оны жұрт жеңіске жетеді дейтін. Әзірлеген Мамадияр ЖАҚЫП.