Арнаулы өкілдердің мәлімдемесі

Кеше Қырғызстанға бірлескен сапарлары қорытындылары бойынша БҰҰ Бас хатшысының Арнаулы өкілі, БҰҰ-ның Орталық Азия бойынша превентивті дипломатия Өңірлік орталығының басшысы Мирослав Енча мен ЕҚЫҰ Іс басындағы төрағасының Арнаулы өкілі Жәнібек Кәрібжанов және ЕО-ның Орталық Азия бойынша Арнаулы өкілі Пьер Морель мынадай мәлімдеме жасады. Арнаулы өкілдер елдегі жағдайды тұрақтандыру бойынша күш-жігерлерге; Қырғызстанның бүкіл тұрғындарын қау­іп­­сіздік және тең мүмкіндіктермен қам­­тамасыз етуге; таяудағы зорлық-зомбылықтан зардап шеккендерге кө­мек ұсынуға; жекеменшік құқын қоса алғанда, адам құқығын қорғауға; этнос­аралық үнқатысуды дамытуға; ұлттық татулық үдерісін ілгері жылжытуға өз­дерінің қолдауын тағы да қуаттайды. Заң үстемдігін нығайту, оның ішінде сәуір және маусым оқиғалары бойын­ша сот үдерістері кезінде қоғамды одан әрі демократияландыру мен адам құқын сақтау басты шарт. Үкіметтің осы саладағы күш-жігерін қолдау үшін нақты қадам ретінде олар Қырғызстанға Азаматтық қауіпсіздік бастамасы арқылы көмек көрсету бойынша өткен аптада қабылданған ЕҚЫҰ Тұрақты кеңесінің шешімін қолдайды. 10 қазанда өткен парламенттік сай­лаудың маңызын атап өте келіп, Арнаулы өкілдер парламентке өткен сая­си партиялар лидерлерімен кездесу­лер өткізді және конструктивті саяси үнқатысудың қажеттігін атап көрсетіп, оларды қысқа мерзімде коалициялық өкі­мет жасақтауға шақырды. Қазіргі уа­қытта демократиялық институттарды ны­ғайтып, биліктің заңдылығын бекемдеу өмірлік маңызды мәселе болып табылады. Арнаулы өкілдер Қырғызстан хал­қы­ның алдында, әсіресе, қыс қаһарына мінер тұста тұрған әлеуметтік-экономи­калық проблемаларды шешу бойынша жұмысты жалғастырудың маңызын атап көрсетеді. Әлеуметтік және эко­номикалық қалпына келтіру елдің тұрақ­ты дамуы үшін аса қажетті шарт болып табылады. Бұл үшін үкімет тарапынан жедел де нәтижелі іс-қимыл керек. Арнаулы өкілдер Қырғыз Республикасы үкіметінің өтініші бойынша құрылып, Қырғызстанның оңтүстігіндегі оқиғаларды тергеу бойынша жұмысын бастаған тәуелсіз халықаралық комис­сияның іс-әрекетін құптайды. 2010 жылдың 1-2 желтоқсанында көршілес Қазақстанда өтетін ЕҚЫҰ Сам­миті ұсынатын мәселелердің маңыз­дылығын назарға ала отырып, Арнаулы өкілдер халықаралық қоғамдастықтың қырғыз билігіне олардың зардап шеккен аудандарды қалпына келтіру, заңдылықты нығайту және елдің және оның халқының тұрақты болашағы үшін жағдай жасау бойынша қолдау көрсетуді жалғастыруға дайын екенін қуаттайды.