Әркез қолдау көрсетуге әзірміз

Қазақстан Республикасының Президенті, «Нұр Отан» ХДП Төрағасы Н.Ә.Назарбаевқа

Аса құрметті Нұрсұлтан Әбішұлы! Сіздің пікірлестеріңіздің, «Нұр Отан» партиясы мүшелерінің атынан Сізді Астанада ЕҚЫҰ Саммитінің табысты өтуімен шын жүректен құттықтаймыз! Бұл Саммит Қазақстанның аталған беделді халықаралық ұйымға төрағалы­ғының шарықтау шегін көрсетіп қана қоймай, сонымен қатар, біздің еліміздің әлем алдындағы абыройының күннен-күнге арта түскенін, Қазақстан Көшбасшысының тұлғалық жоғары беделін көрсетті. Қазақстан кеңестік кезеңнен кейінгі елдердің ішінде алғашқы болып ірі халықаралық ұйымға басшылық етті және оның қызметіне біздің еліміздің жауапты міндетті табысты әрі тиімді жүзеге асыруына жол ашқан жаңа мазмұн мен жаңа леп әкелді. Сондықтан әлемдегі азулы мемлекет басшыларының Қазақстанның ЕҚЫҰ-ға төрағалығы мен соңғы 11 жылда алғаш рет өткізіліп отырған Саммиттің ұйымдастырылуына берген жоғары бағасы – Қазақ­стан­ның көшбасшылығын, тәуелсіздік алған жылдар ішінде әлеуметтік-эко­но­микалық және демократиялық зор табыстарға жеткенін, сондай-ақ, жаһандық және аймақтық қауіпсіздікті қамтамасыз етуге қосқан Сіздің айрықша үлесіңізді мойындау деп білеміз. Осы күндері барлық қазақстандықтар әлемдегі жетекші елдер басшыларының Қазақстан Көшбасшысының еуразия­лық үнқатысуды дамытуға жаңа тыныс беріп, құрлықтағы бейбітшілік пен тұрақтылықты ілгері бастырудағы саяси ерік-жігері мен күш-қуатына тәнті болғандарына куә болды. Қазақстанның жас әрі гүлденген елордасы – Астанада өткен ЕҚЫҰ Саммиті, сөз жоқ, біздің еліміз тарихындағы ең айтулы күндердің бірі. Сондықтан да, миллиондаған қазақстандықтар өз Отаны мен өз Көшбасшысы үшін шексіз ризашылық сезімге бөленгені сөзсіз. Тағы да ЕҚЫҰ Саммитінің табысты өтуіне арналған біздің ең ыстық лебізіміз бен құттықтауымызды қабыл алыңыз және Қазақстан дамуындағы Сіз жүргізіп отырған стратегиялық бағыттарға біздің барынша қолдау көрсете­тінімізге сендіруге рұқсат етіңіз.

«Нұр Отан» ХДП Саяси кеңесі.

Абыройымызды асқақтатқан жиын

Елордасында ең жоғары  дәрежеде өтіп, Қазақ елінің даңқын аспандата түскен ЕҚЫҰ Саммиті – әрбір азамат үшін үлкен қуаныш, зор мәртебе, Қа­зақстанның абыройын асқақтата түс­кен тарихи ұлы оқиға. Ал ұлт мәр­те­бе­сінің биік белеске көтеріліп, әлем ал­дындағы жоғары бедел мен сый-құрметке бөленуі тәуелсіз Қазақ елі­нің тұңғыш Президенті, барша әлем мой­ындаған саңлақ саясаткер Нұр­сұл­тан Назарбаевтың өмірлік қағи­да­сына айналған өлшеусіз еңбегінің жемісі. Әлем асыға күтіп, мол үміт артқан бұл жиынды Маңғыстаудағы этномә­дени бірлестік өкілдері де теледидар арқылы зер сала көріп, ондағы айтыл­ған әңгіме, көтерілген өмірлік мәні зор проблемаларды бірлесе шешудің Қазақ елінің төрінде талқыға түскен­дігін көріп, көңілдеріне мақтаныш сезімдері ұялады. Ғалам көз тіккен салиқалы басқосудың еліміздің төр­аға­лығымен өтуін жақсылыққа жо­рыды. Азияда бұрын-соңды болмаған ертегідей ерекше Саммиттің еліміз бен жеріміздің мерейін үстем ете түс­кендігіне мерейленді. Ондай мақта­ныш сезімі жайлы Саммит аясында өт­кізілген «дөңгелек үстел» отыры­сында, облыстық әкімдікте облыс басшылығымен бірге теледидардан тамашалаған Саммиттің өту бары­сында, ауылдарда болған ақпараттық топтар құрамында болған ұлттар мен ұлыстар өкілдері Елбасы еңбегі мен салиқалы саясатын қолдайтындық­та­ры жиі айтылды. Бұл ретте облыста осыдан он жыл бұрын құрылған «Алатоо» қырғыз этномәдени бірлестігінің төрағасы Қ.Ғазыбековтің Қазақстанның ЕҚЫҰ төрағасы кезінде сондай-ақ, көрші-туысқан халық ретінде де Президент Нұрсұлтан Назарбаевтың қырғыз еліне жасап отырған көмегін және де Саммит кезіндегі өз еліне деген ұлағатты сөздер мен ыстық лебіздеріне ризашылығын білдірді.  Қырғыз елін жақсы күндер күтеді деген сенімін де жасырмайды ол. Жалпы, біздегі 19 этномәдени бірлестік өкілдерінің қайсысы да Астана Саммиті дүние жүзінде бейбітшілік пен бірліктің, қауіпсіздіктің,  халық­тар достығының нығая түсуіне өл­шеу­сіз үлес қосқан басқосу болып, әлем таныған Елбасымыз Нұрсұлтан Назарбаев биік беделді, танымал тұл­ға екендігін тағы да бір паш етті деп санайды. Елбасымыз аман, ел іргесі биік болсын! Мұқанжан КАМАЛОВ, Маңғыстау облысы Қазақстан халқы Ассамблеясы хатшылығының меңгерушісі.

Ел тілегінің жетегінде болдық

Тәуелсіздігімізді алған күнінен бастап елімізді көркейту жолында, әсіресе, жас ұрпақты оқытып, тәр­бие­леу бағытында Елбасы күні ертең мемлекетіміздің алтын діңгегі бола­тын жас ұрпаққа барлық мүмкіндікті жасап келеді. Содан бергі 20 жылға жуық уақыт ішінде миллиондаған ұл мен қыз мектеп бітіріп, қазір олар елдің өркендеуіне өз үлестерін қосу үстінде. Соңғы жылдары прези­дент­тің тікелей қолдауымен Отанымызда талантты балаларға арналған интел­лектуалдық мектептер ашылып, жұ­мыс істеп келеді. Қазір бұл мектептер – Назарбаев зияткерлік мектептері деп аталады. Осы білім ұяларының оқушылары мен ұстаздары Елбасы саясатын қол­дап қана қоймай, өз үлестерін қосуда. Соның бір айғағы кеше жұмысын аяқтаған ЕҚЫҰ-ның Астана Саммиті дер едік. Бұл саяси форум еліміздің мәртебесін асырумен бірге, тұрақты тірлігіміздің тынысын да көрсетіп берді. Ванкуверден Владивостокқа дейінгі аралықтағы ұлан-ғайыр ау­маққа, күні кеше өзгеге тәуелді жұрт­тың, өз тәуелсіздігін алғаннан кейінгі аз уақыттың ішінде төрде отырып, төрағалық жасауға қолының жетуі – бұл Тұңғыш Президентіміз, жалпы­ұлттық Көшбасшымыз Нұрсұлтан Назарбаевтың сара саясатының жемісі дер едім. 10 айдың ішінде төраға ретінде атқарған жұмыстарға мен тоқталма­сам да қалың жұрттың көзі жетті. 56 мемлекеттің басын біріктірген мәрте­белі Ұйым мүшелерін адамзаттың айбынды ісін атқару жолында ұйыту – екінің бірінің қолынан келе бермейтін шаруа. Біздің Елбасы бастаған азаматтарымыз осы жауапты істі үлкен жетістікпен ұйымдастыра алды. Бұл КСРО заманында беймәлім жұрт­тың аз уақыт ішінде экономикалық жағынан қарыштап дамығанын, демо­кратиялық өрлеу жолында мықты қадам жасағанын, сөйте отырып, өңірлік және жаһандық қауіпсіздікті қамтамасыз ету, атом қаруынан өз еркімен бас тарта отырып, бейбітшілікті орнықтыру ісінде өзінің сара бағытының бар екенін дәйектеді. Әсіресе, бұған дейін дүние жүзі жұртшылығының назарын ерекше аударған Азиядағы қауіпсіздік мәсе­лесін бірінші болып көтеріп, өр­ке­ниеттер арасындағы үнқатысуды жолға қойған, Әлемдік және дәстүрлі діндер көшбасшыларының құрылтайын жо­ға­ры дәрежеде ұйымдастырып, ядро­лық қарудан бас тарту жөнінде тың қадамдар жасаған біздің Отаны­мыз­дың алға қойған басты мақсаты адамзаттың алаңсыз өмір сүруіне үлес қосу бағытында жұмыстану болып табылады. Осындай бейбітшілікті ту етіп көтерген мемлекеттің әрбір жақсы ісі жұртшылықтың дәйім қолдауына ие болып келеді. Назарбаев зияткерлік мектебінің ұстаздар қауымы Астана Саммитінде көтерілген мәселелердің қорытынды құжатта көрініс табуы Елбасымыздың дана ойының, сара саясатының жүзеге асуы деп біледі. Бекзат РЫСБЕКҰЛЫ, Назарбаев зияткерлік мектебі тарих пәнінің мұғалімі. Астана.

Астана рухы жеңіске жетті

ЕҚЫҰ-ның Саммитінің Астанада өтуі – бұл мемлекетімізге, бүкіл халыққа көрсетілген айрықша сенім, зор мәртебе, 20 жылға да толмаған жас мемле­кеті­міздің саяси, экономикалық жетістіктерінің нәтижесі.Саммитті өткізуге бастама­шылық жасаған Елбасымыз Н.Ә. Назарбаевқа, оның халықаралық беделіне 55 мемлекет басшылары теңдесі жоқ тарихи сенім артты. Мен Саммит барысын ақпарат құралдары арқылы үзбей бақылап отырдым, себебі, Астанадағы Шолу конференциясына қатысқан біздер мұндай кең басқосуда 11 жыл өткеннен кейін кездескен мемлекет басшыларының бір пікір, бір түйінге келуі оңай болмасын сезгенбіз. Саммит қауырт, үзіліссіз жұмыс істеді. 55 елдің басшы­ла­ры мен халықаралық ұйымдар жетекшілері заман, уақыт тудырған күрделі мәсе­ле­лерді қызу талқылап, сараптама жасап, оларды шешу, дамыту шараларын белгіледі. Бүкіл Еуразия кеңістігі, оның миллиондаған халқы Астана Саммитіне үлкен үміт артты, себебі, қауіпсіздік – барлық елдерге ортақ мұрат, басты құндылық. Үміт ақталды, Саммиттің басты құжаты – Декларация қабылданды. 35 жыл араға салып «Хельсинки рухы» деген түсініктен кейін Атлант мұхиты мен Тынық мұхиты аралығында орналасқан 55 ел үшін «Астана рухы» деген ұғым өмірге енді. Саммитке қатысушы делегация басшылары түгел дерлік Қазақстанның ЕҚЫҰ-ға төрағалығына, Саммиттің ұйымдастырылуы дәрежесіне жоғары баға берді, төрағалық аясында халықаралық ұйымның беделін арттыратын, жұмысына жаңа серпін беретін нақты шаралар өткізілгенін атады. Бұл біздің еліміздің, Елбасымыздың халықаралық қоғамдастық алдындағы абыройы мен беделін арттыра түсетіні сөзсіз. Біздер, сырбойылықтар, қазақстандықтарды дүние жүзі таныған Астана рухына лайық болуға шақырамыз. Д.АҚМАҒАМБЕТОВА, «Қызылорда облысы Азаматтық Альянсы» қауымдастығының төрайымы.