АҚШ-та рок әншінің мәйіті табылды

АСТАНА. 5 қаңтар. АҚШ-тың Оклахома штатында Backroad Anthem рок-тобының жетекшісі, әншісі Крейг Стриклендтің жансыз денесі табылды. Бұл туралы ТАСС ақпарат агенттігіне сілтеме жасаған egemen.kz тілшісі хабарлады. 2015 жылы 26 желтоқсан күні 29 жастағы әнші өзінің досы, әрі әріптесі 22 жастағы Чейз Мэрлендпен бірге Оклахома штатының солтүстігіндегі Ко-Лейк көлінде жабайы үйректерге саятшылық құру үшін серуендеп шыққан. Алайда, олар мінген қайық аударылып, батып кетті. Іздеу кезінде арада үш күн өткен соң барып, 29 желтоқсан күні Мэрлендтің мәйіті табылды. Ал Стриклендті бүгінге дейін таба алмаған. Backroad Anthem тобының өзге бес әншісі жетекшісінің хабарсыз кеткенін айтып, полиция қызметкерлеріне хабар берген. Ғаламтор арқылы іздеу де жариялаған. Айта кетейік, ұжым 2012 жылы Арканзас штатында құрылған. Кантри-рок әдісінде ән айтып келеді. Алғашқы ән-жинақтары 2013 жылы жарық көрген. Аян Әбдуәли. Дерек: ТАСС. Сурет: ren.tv.