Белгілі актер Меңтай Өтепбергенов қайтыс болды

АСТАНА. 5 қаңтар. Бүгін Алматыда 70 жасқа қараған шағында белгілі актер, Қазақстанның еңбек сіңірген мәдениет қайраткері және Қазақстанның еңбек сіңірген әртісі Меңтай Өтепбергенов қайтыс болды. Бұл туралы «Қазақфильм» киностудиясының баспасөз қызметіне сілтеме жасаған egemen.kz тілшісі хабарлады. Меңтай Өтепбергенов 1946 жылы 7 тамызда Шығыс Қазақстан облысының Бесқарағай ауданына қарасты Беген ауылында туған. Мәскеу цирк училищесін, сондай-ақ, 1974 жылы Сергей Герасимов атындағы Бүкілресейлік мемлекеттік кинематография институтының (ВГИК) актерлік факультетін бітірген. Меңтай Смағұлұлы КСРО елдерінің 13 киностудиясында 60 картинаға түскен. Кинотуындыларда 17 ұлттың өкілі ретінде ойнады. Одан бөлек, анимациялық фильмдерге дубляж жасады. Ол «Белый шаман», «Тайны мадам Вонг», «Частный детектив, или операция «Кооперация», «Интердевочка», «На Дерибасовской хорошая погода, или на Брайтон Бич опять идут дожди», «Рэкетир» сынды фильмдерде әртүрлі образдарды сомдады. Сонымен қатар, Меңтай Смағұлұлының есімі Қазақстанда пантомимо өнерін қалыптастырушы ретінде тарихқа жазылғанын атап өткен жөн. Актерді жерлеу рәсімі 7 қаңтар күні өтеді. Еламан Қоңыр. Дерек: «Қазақфильм» киностудиясының баспасөз қызметі. Сурет: kruto.me.