Ұлттық рухты тербеген шығарма Түркияда жеке кітап болып шықты

Әдебиетке цензура қатаң бақылау жасаған Кеңес үкіметі кезінде, көп қиыншылықпен жарық көрген көркем шығар­маның бірі – «Ақ аруана» атты повесть болатын. Сәбит Доса­новтың ұлттық рухты тербеген осы сүйекті шығармасы жақында Түркияда жеке кітап болып шықты. «Ақ аруана» кітабында жазушының өмірдің өзекті проблемаларын өткір көтерген «Жусан иісі», «Сыңсып ұшқан сыңар аққу» сынды әңгімелері де бар. Кітапқа алғысөз жазған белгілі әдебиет сыншысы Имдат Афшар. Анкарада өткен түрік әлемі ақындары мен жазушыларының фестивалінде түрік тілінде шыққан осы «Ақ аруана» кіта­бының тұсауы кесілді. Тұсау­кесер рәсімін жүргізген Әзер­байжанның көрнекті мемлекет және қоғам қайраткері, Әзер­байжан Парламентінің депутаты Ганира Пашаева түркі әлемі қаламгерінің «Ақ аруана» кітабы жайлы жылы лебізді пікірлер үшін алғыс айтты. «Ақ аруананы» түрік тіліне аударған түріктің көрнекті жазушысы Имдат Афшар, оны жарыққа шығарған Түркиядағы беделді баспалардың бірі – «Айсу йайынчылык». «Ақ аруана» үстіміздегі жылы Бакуде, Бішкек пен Ташкентте де жарық көрген болатын.Түркияның беделді басылымдарында жарияланған мақалаларда қазақ қаламгерінің шығармаларына терең талдау жасалған. «Короглу» жур­налының желтоқсан айындағы санында Сәбит Досанов шы­ғар­машылығы жайлы кө­лемді мақала жарияланды. «Ақ аруананың» тұсау кесер рәсімі таяу күндері Алматыда өтпек. Оған Түркия мен Әзер­байжанның, Өзбекстан мен Қыр­ғызстанның көрнекті жазушылар қатысады деп күтілуде. «Егемен-ақпарат». Суретте: түріктің көрнекті жазушысы Имдат Афшар және Әзербайжанның көрнекті мемлекет және қоғам қайраткері, Әзербайжан Парламентінің депутаты Ганира Пашаева.