Шапағатты шара

Дүниені ұстап тұрған – мейірім. Адамзат баласының бойындағы осы бір қасиет бар жақсылықтың, ырыс-берекенің тұтқасы. Егер мейірімнен айырылсақ, онда дала тағысынан еш айырмамыз қалмас еді. Жаңа жыл қарсаңында Қызылорда облысында әдемі бір шара өтті. Шапағатты шара дер едік біз. Аймақтағы жүзге жуық кәсіпкер «Жүрек жылуымен» атты қайырымдылық акциясына қатысты. Бұл шараның биыл бірінші рет өткізіліп отырғанын айта кетейік. Осы бір мейірім-шапағаттың шарасында әлеуметтік жағынан аз қамтылған 1200 отбасына жалпы құны 7 миллион теңге тұратын азық-түлік пен қажетті киім-кешек үлестірілді. 22 ГАЗел авто­кө­лігіне тиелген зат жұртшылыққа таратылды. – Бүгінгідей қайырымдылық акция­сының өткізіліп отырғанына біз өте қуаныштымыз. Әсіресе, мереке қар­саңында көмек көрсетіп жатқан барлық азаматтарға алғысымызды айтамыз. Мен өзім отбасыммен жатақханада тұрамын. Мүмкіндігі шектеулі кішкентай немерем бар. Әлеуметтік көмекті қажет ететін мыңдаған отбасына қолұшын созу шарасы дәстүрге айналатынына сенеміз,– дейді аталған акцияға қатысушы Жанат Махамбетова. Бүгінгі шараға арнайы барған облыс әкімі Қырымбек Көшербаев акцияны өткізуге атсалысып, тұрмысы төмен отбасыларға қолдау көрсеткен барлық азаматтарға, іскер адамдар мен мемлекеттік, қоғамдық ұйым өкілдеріне алғысын білдірді. – Елбасы Нұрсұлтан Назарбаев «Мем­лекет пен бизнес экономикалық қана емес, әлеуметтік мәселелерді шешуде де әріптес болуы тиіс», деген болатын. Әлеуметтік әділ­дік, теңдік, өзара сыйластық пен қам­қорлық туралы ниетті тек қана мемлекет емес, азаматтық ор­таның өзінің көтеруі қоғамымыздың кемелденгендігін көрсетеді. Сондықтан да бұл құптарлық және жан-жақты қол­дауға тұратын бастама,– деді Қы­рымбек Елеуұлы. Акцияға атсалысқан белгілі кәсіп­керлер мен халық қалаулылары, мем­лекеттік қызметкерлерден шара аясында ұйымдас­тырылған арнайы көмек жәшігіне 3 миллион теңгеге жуық қаржы жиналды. Ал шараға қатысқан мүмкіндігі шек­теулі азаматтарға арнайы бекітілген автокөліктер азық-түліктерін үйіне дейін жеткізіп берді. Ержан БАЙТІЛЕС, «Егемен Қазақстан». ҚЫЗЫЛОРДА.