Шымкентте «Қазақстан» кинотеатры өртенді

АСТАНА. 11 қаңтар. Шымкентте «Қазақстан» кинотеатрының көрермендер залы өртеніп кетті. Бұл туралы tvk телеарнасы хабарлады. Өрт кинотеатрдың көрермендер залындағы орындықтардан шыққан. Тілсіз жау 126 шаршы метр жерді шарпыған. Оны ауыздықтауға қаладағы 14 өрт сөндіру бөлімдерінің қызметкерлері жұмылдырылған. Төтенше жағдайлар басқармасының өкілі Мадияр Жақсыбаев: «Бұл өртке жеке құрамның 50 адамы және 14 бірлік техника жұмылдырылды. Бұл төтенше оқиға бойынша Шымкент қаласының Төтенше жағдайлар басқармасы, сондай-ақ, облыстық Ішкі істер департаменті тергеу жүргізуде. Өрттің себебі анықталуда, ол 16.58-де ауыздықталды», – деді. Айта кетейік, «Қазақстан» кинотеатры қарыз үшін банктердің біріне берілген болатын. Ал екі жыл бұрын мемлекет меншігіне алынды. Жөндеуден кейін мұнда облыстағы барлық этномәдени орталықтарын орналастыру жоспарланған-ды. Талғат Райымбек. Дерек, сурет: tvk.