Бизнесті заңсыз тексеру кестелеріне талдау жүргізілді

АСТАНА. 11 қаңтар. Бас прокуратураның Құқықтық статистика және арнайы есепке алу жөніндегі комитетіне (ҚСжАЕК) бақылау және қадағалау органдарының тексерулер кестесін орналастыру жүктелген. Бұл туралы Бас прокуратураның баспасөз қызметі хабарлады. ҚСжАЕК-ке 2016 жылдың І жарты жылдығына арналған ерекше тәртіп бойынша тексерулер кестесіне орналастыру үшін төрт мемлекеттік органның – Ішкі істер министрлігі Төтенше жағдайлар комитетінің, Ұлттық экономика министрлігі Тұтынушылардың құқықтарын қорғау комитетінің, Инвестициялар және даму министрлігі Индустриялық даму және өнеркәсіптік қауіпсіздік комитетінің, Қарулы Күштердің Бас әскери-медициналық басқармасының тексерулер кестелері келіп түсті. Комитет заң бұзушылық болып табылатын мемлекеттік тіркелген сәтінен 3 жыл мерзімі өтпеген шағын кәсіпкерлік субъектілерін тексеру кестелеріне қосу фактілерін анықтау үшін келіп түскен кестелерге талдау жүргізді. Мониторинг барысында тұтынушылардың құқықтарын қорғау органдарында осындай 77 факт, төтенше жағдайлар жөніндегі органдарда 20 факт, сонымен қатар, кестелерге дұрыс емес деректерді енгізуге байланысты 200-ден астам бұзушылық анықталды. Осыған байланысты, уәкілетті органдардың мекенжайына заңдылықтың бұзылуын жою туралы ұсыныстар енгізілді, заңсыз тексерулер кестелерден алынып тасталды. Жүргізілген жұмыстың нәтижелері бойынша келіп түскен барлық кестелер Бас прокуратураның сайтында орналастырылды. ҚСжАЕК заңсыз тексерулердің алдын алу, мемлекеттік органдардың кәсіпкерлік қызметке заңсыз араласуын болдырмау бойынша жұмысты жалғастыруда. Еламан Қоңыр. Дерек: Бас прокуратураның баспасөз қызметі. Сурет: egov.kz.