Бақ пен бап қатар шапты

Өткен сейсенбіде Құрлықтық хоккей лигасы шеңберінде Астананың «Барысы» өз айдынында Минскінің «Динамосын» қабылдап, 4:2 есебімен басым түсті. Ойынның бірінші кезеңінде командалар бір-біріне лайықты қарсылық көрсетті. Алайда, бұл бөлікте гол соғылмады. Есесіне, екінші кезеңде жанкүйерлер төрт голдың куәсі болды. Кезең бастала салысымен алға ұмтылған айдын иелері 21-минутта қорғаушы Кевин Даллмэннің көмегімен есеп ашты. Арада 8 минут өткенде, «Барыс» сапынан Максим Худяков мергендігімен көзге түсті. Қақпаларына екі шайба жіберіп алғанына қарамастан, қонақтар шабуылда сауатты ойнады. Нәти­жесінде 32-минутта динамолық хоккейші Пол Щехура есеп айыр­масын қысқартты. Әйтсе де, бір­неше секундтан кейін «Барыс» қайтадан екі шайба айырмасымен алға шықты. Бұл жолы Дастин Бойд нәтижелі соққының авторы атанды. Соңғы кезеңде, яғни, 44-минутта астаналықтар тағы бір шайба соқты. Бұл жолы «Динамоның» қақпасын Брэндон Боченски дәл көздеді. Ал минскіліктер 49-минутта тағы бір шайбамен қарымта қайтарды. Аталған гол Райан Вескенің енші­сіне жазылды. Ойынның қалған уақытында есеп өзгерген жоқ. Осылайша «Барыс» маусымдағы 26-жеңісіне қол жеткізді. Лиганың тұрақты чемпионатының аяқ­талуына 8 тур қалған тұста Андрей Назаровтың шәкірттері 78 ұпаймен Шығыс конференциясында 7-орында келеді. Біздің команда келесі кездесуін бүгін Астанада Омбының «Авангардымен» өткізеді. Еламан ҚОҢЫР, «Егемен Қазақстан».