Тікұшақ тұманнан адасып құлады

Алматы облыстық төтенше жағдайлар департаментінің хабарлауынша, 2016 жылғы 27 қаңтар күні сәрсенбіде Үшарал ауылынан ауыр науқасты облыстық ауруханаға жеткізу үшін Талдықорғанға бет алған MD-600 Helicopter тікұшағы тұманды қарлы боранның салдарынан адасып кеткен. Шұғыл іздестіру жүргізілгенімен, Талдықорғаннан 18 шақырым жердегі сайда апат болған тікұшақ ертеңгі таңғы 8 сағат 20 минутта бір-ақ табылды. Санитарлық авиация мен «Аспан» әуе компаниясының мә­ліметі бойынша тікұшақтағы 5 адам түгел мерт болыпты. Осы күні оқиға орнына Ішкі істер ми­нис­трінің орынбасары, генерал-лейтенант Вла­димир Божко және Алматы облысының әкімі Амандық Баталов келіп жетті. Өңір басшысы тарапынан шұғыл шешім қабылданып, қайтыс болғандарды жерлеу рәсімі атқарылып, жан­ұяларына 1 млн. теңгеден ма­териалдық көмек көрсетілетін болды. Орын алған оқиға бойынша тергеу амалдары жүр­гізілуде. Нұрбол ӘЛДІБАЕВ, «Егемен Қазақстан». Алматы облысы.