Ақтоғайдың алғашқы мысы

«Қазақмыс» компаниясы дағ­дарыс заманының өзінде да­муға мүмкіндік барын іспен дә­лелдеп келеді. Бүгінгі күнде кәсіп­орын Ақтоғай және Бозшакөл кен орындарын іске қосуды қолға алған. Қазіргі уақытта аталған кен орындары «KAZ Minerals» тобына қарайды. Бұл соңғы кезде компания­да болған құрылымдық өзгерістердің нәтижесі. Жаңа жыл қарсаңында Семей өңіріндегі Ақтоғай кешені іске қосылып, тотықтандырылған кеннен алғаш­қы катодты мыс алынған болатын. Жоспар бойынша биылғы жартыжылдық ішінде өндірістің қуаты жылына 15 мың тонна мыс өндіретін деңгейге жеткізілмекші. Ақтоғай кен орнын игеру жұмыстары 2012 жылдан бері жүр­гізіліп келеді. Сол жылдың жел­тоқсан айында мыс кенін өндіру жөніндегі жоба бекітіліп, алғашқы жұмыстар басталған болатын. Шал­ғайдағы Бозшакөлден бұл жердің айырмашылығы, бо­лашақ комбинат жанында электр қуатының желі­лері, көлік ком­муникациясы секіл­ді инфрақұ­рылымдар дайын еді. Құры­лыс жұмыстарын кедергісіз бас­тауда бұл айтарлықтай қолайлылық туғызды. Тау-кен жабдықтары қойы­латын орынға дейін темір­жол, су құбыры тартылып, екі-үш жыл бойы жаңа кешен салу жөнін­дегі қайнаған еңбек толассыз жүргізілді. Соның нәтижесінде өткен жылдың басында кенді топтап сілтілендіру және электролиздеу корпустарының құрылысы қолға алынып, жаңа жабдықтар жеткізіле бастады. Вахталық кент те салынып бітуге жақын. Осы­лайша кен өндірісінің үлкен жобасы бас-аяғы үш жылдың ішінде іс жүзіне асырылды деуге болады. Тотыққан кеннен алғашқы катод мысының алынуы соның айғағы. Мамандардың есебінше, ашық әдіспен кен өндіретін Ақтоғай кешені жобасының құны 2,3 миллиард долларды құрайды. Өнімнің өзіндік құны да белгілі. Қазіргі болжам бойынша бір тонна мыстың өндіру шығыны 2200 доллардан айналады. Мұнда 2017 жылы сульфидті кен құрамын өңдейтін фабрика іске қосылмақшы. Қазір құрылыс және жабдықтау жұмыстары жалғасуда. Алғашқы 10 жылдың ішінде орта есеппен жылына 150 мың тонна мыс өнімі алынуы тиіс. Комбинат толық пайдалануға берілген кезде 1500-дей адам еңбек ететін кен орнының қоры 50 жылға жобаланған. – Ақтоғай кен байыту комбинатында алғашқыда тотыққан кенді өндіру және өңдеу үдерісі жүргізіледі. Біздің компания үшін қуанышты сәт, айтулы оқиға. Кен өндіру, өңдеу кеше­нінде 2 мыңдай адам еңбек еткенін де атап өту керек. Олардың басым көп­шілігі өзіміздің жұмыскерлер болды, қалған екі пайызы ғана шетелден келген мамандар, – деп атап өткен «KAZ Minerals» тобы басқармасының төр­ағасы Олег Новачук компания бас­па­сөз қызметі таратқан хабарламада. Қайрат ӘБІЛДИНОВ, «Егемен Қазақстан». Қарағанды облысы, Жезқазған қаласы.