Қазақстандықтарға зика безгегіне қарсы ескерту жасалды

АСТАНА. 30 қаңтар. Тұтынушылар құқығын қорғау комитеті қазақстандықтарға Оңтүстік Америка елдеріне тараған зика індетіне асқан сақтықпен қарауды ескертеді. Бұл туралы tengrinews.kz сайтына сілтеме жасаған egemen.kz тілшісі хабарлады. Дүниежүзілік денсаулық сақтау ұйымы қауіпті індеттің 2015 жылы сәуір айында Бразилия мемлекетінде басталғанын ресми түрде хабарлады. Осыдан соң, Оңтүстік Американың өзге де елдеріне тараған. Зика індеті 27 қаңтар күні әлемнің 27 еліне тарағаны белгілі болды. Олар: Барбадос, Боливия, Бразилия, Кабо-Верде, Колумбия, Эквадор, Сальвадор, Фиджи, Француз Гвианасы, Гваделупа, Гайана, Гаити, Гондурас, Мальдив, Мартиника, Мексика, Жаңа Каледония, Панама, Парагвай, Пуэрто-Рико, Сен-Мартен, Самоа, Соломон аралдары, Суринам, Таиланд және Венесуэла. Зика індеті көбіне қауіпті вирус жұқтырған жәндіктер мен торпикалық аймақтарда өмір сүретін масалар арқылы жұғады. Адамдар арасындағы жұқпалы аурулардың қатарына жатпайды. Дене қызуы, тітіркенуі, буын арасындағы жайсыздық, бас аурулары індеттің негізгі белгілері болып есептеледі. Зика әсіресе жүкті әйелдер үшін аса қауіпті. Жүктіліктің алғашқы 12-16 аптасында жұқтырған болашақ анадан микроцефалиямен ауырған нәресте дүниеге келеді. Микроцефалия сәбидің бас сүйегі мен ми құрылысының дамуына кері әсерін тигізеді. Бұл кезде арнайы вакциналар еш көмектеспейді. Тұтынушылар құқығын қорғау комитеті қазақстандықтардың шетелге барған кездерінде осы мәселеге асқан сақтықпен қарауды ескертті. Лажы болса, қауіптің беті қайтқанша, шетелге бармағандары жөн екенін алға тартты. «Шетелге барған қазақстандықтар ауру таратқыш масалардан қорғанып, жабық киімдер кигені жөн. Лас аймақтардан алыс болып, қонақ үйлерде тек салқындатқышты ғана пайдаланулары қажет. Қазақстанға келгеннен кейін ауру белгілері білінген болса, уақыт созбай дәрігерлер көмегіне жүгінгендері жөн», – дейді тұтынушылар құқығын қорғау комитеті. Аян Әбдуәли. Дерек: tengrinews.ru. Сурет: livemint.com.