АЛМАТЫ. 31 қаңтар. Алматыдағы Жастар театрында «Бір түп алма ағашы» драмасы аншлагпен өтіп жатыр. Ғабит Мүсірепов атындағы Қазақ мемлекеттік академиялық балалар мен жасөспірімдер театрының жаңа қойылымы көрермендер көптеп баратын спектакальдердің қатарына қосылды. Бұл туралы egemen.kz тілшісі хабарлады.
Қазақстан Республикасының еңбек сіңірген артисі, талантты режиссер Мұрат Ахмановтың кезекті жұмысы театр қауымдастығының көңілінен шықты. Мұрат Ахманов бұған дейін бірнеше спектакльді осы театрдың төрінде сахналап, сәтті пьесалардың режиссері атанған болатын.
Әлімбек Оразбековтің драматургиялық шығармасына қойылып жатқан спектакль театрдың жас актерлерін ғана емес, Қазақстан Республикасының еңбек сіңірген артисі Гүлжамал Қазақбаева, Қазақстанның халық артисі Роза Әшірбекова, Қазақстанның еңбек сіңірген қайраткері Сә Рақышев, Қазақстанның еңбек сіңірген қайраткері Райхан Қалиолдина сияқты сахна саңлақтарын көрермендерімен қайта қауыштырды.
Премьерасы жүріп жатқан сахналық қойылымда Қазақстан жастар одағы «Серпер» сыйлығының лауреаты Әсет Иманғалиев, Қуаныш Тұрдалин, «Дарын» Мемлекеттік сыйлығының лауреаты Рахман Омаров, Ербол Садырбеков сынды өнердің бел баласына айналып үлгерген жандардың ойыны көрермендер көңілінен шығуда.
Қол арбаға таңылып, мүгедектіктің тақсыретін тартқан Мақсат рөлін Дархан Сүлейменов, Әсет Үмбетбаев сияқты жұлдызы жанып келе жатқан жастар сәтті сомдауда.
Айнаш Есали.
Дерек, сурет: egemen.kz.
