Жетпісінде желкілдеген имам

педагогикалық университеттің студенті болып жүр Новосібір облысы, Куйбышев қаласындағы мұсылман ұйы­мының басшысы, зейнеткер Хасан Гизатуллин жоғары оқу орнындағы бірінші курсын бітіріп тастап, екіншісінің сабақтарын бастап кетті. Имам өткен жазда Новосібір педагогикалық университетінің жергілікті филиалына оқуға түскен еді. Ол жақында бірінші курстың түйінді курс жұмысын сәтті тапсырыпты. Ақсақал педагогикалық университетке оқытушыларға жаңа талаптар қойыла бастауына байланысты келіпті. Жасы жетпістен асқан қария, әлбетте, топтағы ең ересек студент болып табылады. Хасан хазірет жасында Сібір автожолдары институтын кәсіби инженер ретінде бітірген. Зейнетке шыққасын жер­­гілікті колледж бен автомектепке оқытушы болып орналасып­ты. Бірақ, өзінің айтуынша, қазіргі заманғы талаптарға сәйкес, оқы­тушының тек профильді ма­мандық иесі ғана емес, сонымен қатар, пе­дагогикалық білімі болуы керек. Сол себепті тағы да студент болуы­на тура келген. Имам-студент енді оқу бағдар­ламасын қысқа мерзім ішінде аяқтап шығуға ниетті де, мүдделі де болып отыр. Қазір ол екінші курстың сабақтарына кіріскен. Ақсақал өзінің тапқан-таянған жалақылары мен зейнетақысын исламды дамытуға, мешітті ұстап тұруға жұмсайды екен. Ал мешіт үшін өзінің жеке үйін босатып беріпті. Бұдан басқа, Хасан абый Қазандағы Ресей ислам универ­ситетінде сырттай білім алып жүр. Ол бұған бұдан бірнеше жыл бұрын түскен екен. Кезінде бір себептермен оқуды тастап кетіпті. Ал жақында зейнеткер ондағы оқуын да жалғастырыпты. Мұрат АЙТҚОЖА.