«Ауыл» партиясы: тізімдегілер толық тіркелді

Өткен сенбіде, яғни 6 ақпан күні өткен Орталық сайлау комиссиясының отырысында «Ауыл» халықтық-демократиялық патриоттық партиясы (ХДПП) атынан Мәжіліс сайлауына қатысуға ниетті барлық 19 үміткердің толық тіркелгені анықталып, оларға тиісті куәліктер табыс етілді. «Сіздердің назарларыңызға Қа­зақ­­стан­ның «Ауыл» халықтық-демо­кра­тиялық пат­риоттық партиясының пар­тиялық тізімін­дегі үміткерлерді тір­кеу туралы қау­лы жобасын ұсынып отыр­мын. Қаулы бойынша «Ауыл» халық­тық-демокра­тия­лық патриоттық партия­сының партия­лық тізімі тірке­леді. Тізім бойынша тір­келген Парла­мент Мәжілісінің депу­тат­тығына кан­дидаттарға куәлік беріл­сін. Олардың саны – 19», – деді қаулы жобасын таныстырған ОСК хатшысы Ба­қыт Мел­дешов. Оның айтуынша, партиялық тізімге енгізілген азаматтардың Қазақстан Респуб­ликасының «Сайлау туралы» заңына сәйкестігі еліміздің Ішкі істер министрлігі мен Бас прокуратурасы арқылы тексерілген. Аталған ведомстволар берген ақпараттарға сәйкес, партиялық тізімдегі азаматтардың барлығының да заңға сәйкестігі анық­талған. Кандидаттардың және олардың жұбайларының табысы және мүлкі туралы декларациялары салық органдарының анықтамаларымен расталған. Осыдан кейін Орталық сайлау комис­сия­сының мүшелері аталған қаулыны бірау­ыздан қабылдады. Бұдан соң «Ауыл» халықтық-демо­кратиялық патриоттық партиясынан Мәжіліс депутаттығына кан­дидаттардың арнайы куәлігі берілді. «Әрбір саяси партия үшін сайлау алдында Орталық сайлау комиссиясына пар­тиялық тізімін тіркеуден өткізу маңызды белес деп есептейміз. Себебі, негізгі жұ­мыс­тардың барлығы да осыдан кейін бастал­­ады. Сайлауға дайындық, сайлау бағдар­ламасын насихаттау жұмыстарының бас­талуы осы тіркелуге байланысты бол­ғандықтан, мұны асыға күткен едік. Канди­дат­тарымыздың барлық қажетті құжат­тарын толық тапсырғанбыз. Өткен съезде бекітілген партиялық тізіміміз толығымен тіркелді», – деді ОСК отырысынан кейін БАҚ өкілдеріне сұхбат берген «Ауыл» ХДПП-ның төрағасы Әли Бектаев. Сонымен қатар, ол алдағы сайлау заң аясында әділ өтетіндігіне сенетіндіктерін жеткізе келіп, тіркеуден өткен үміткер­лердің құрамына қысқаша сипаттама берді. «Біздің 19 үміткеріміздің барлығы да жоғары білімді. Оның ішінде 11 азамат ауыл шаруашылығы мамандығы бо­йынша білім алған. Бесеуі заңгер және экономист. Олардың барлығының да өмірлік тәжірибелері мол. Арамызда бір Мемлекеттік сыйлықтың лауреаты, бес ғылым докторы, үш ғылым кандидаты бар», – деді партия төрағасы. Айта кетейік, партиялық тізімдер бо­йынша сайланатын Парламент Мәжілісі депутаттарының сайлауын әзірлеу мен өткізу жөніндегі негізгі іс-шаралардың Орталық сайлау комиссиясының бекіткен күнтізбелік жоспарына сәйкес, партиялық тізімдерді тіркеу 19 ақпанда аяқталады. Жолдыбай БАЗАР, «Егемен Қазақстан».