Апатқа ұшыраған тікұшақ ұшқышы

жүрегі шыдас бермей қайтыс болды Жақында ғана Жамбыл облысында апатқа ұшыраған тікұшақтың ұшқышы, 62 жастағы Валерий Михин қайтыс болды. Марқұм ақтық демі таусылғанша Тараз қаласындағы №2 ауруханада жатты. Апат кезінде өрт шығып, ұшқыш Валерий Михиннің денесінің 60 пайызға жуығы күйіп қалған болатын. Жансақтау бөлімінде 12 тәулік бойы өкпеге жасанды ауа беру аппаратының көмегімен демалып жатқан пилоттың жүрегі шыдамады. Оның зайыбы мен баласы үнемі қасында отырыпты. Естеріңізде болса, 23 қаңтар күні Жамбыл облысын­дағы Т. Рысқұлов ауданы орталығынан 100 шақырым қашықтықта МИ-2 тікұшағы апатқа ұшыраған еді. Осыдан кейін тікұшақтың құлау фактісі бойынша арнайы комиссия құрылды. Тікұшақ тиесілі «Тараз Жаңа Әлем» компаниясының директоры Валерий Михиннің беті, басы, аяқ-қолдары І-ІІ-ІІІ дәрежеде күйіп қалған. Сонымен қатар, оның тыныс алу жолдарын ІІ дәрежедегі күйік шалған. Оралхан ДӘУІТ, «Егемен Қазақстан». Жамбыл облысы.