Никита Михалковтың көз жасы

немесе Мұхаммед пайғамбар туралы фильмнің тұсаукесері Өткен аптада Мәскеуде пар­сы режиссері Маджид Мад­жидидің «Мұхаммед – Жарат­қанның елшісі» деген филь­мінің көрсетілімі болды. Пайғам­бар­дың балалық шағын сурет­тейтін Иран кинематография­сы тарихындағы ең қымбат фильм «Каро 11 Октябрь» кинотеатрын­да қойылды. Оны көруге көптеген танымал жұлдыздар келді. Солар­дың арасында белгілі режиссер Никита Михалков та болды. Соңынан журналистерге берген сұхбатында Ресей киносының мэтрі алған әсері өте күшті бол­ғанын, тіпті көрсетілімнің кей тұста­рында көзіне мөлтілдеп жас келіп қалғанын жасырмай айтып берді. Михалков ирандық режиссердің картинасын ғазал поэзияға теңеді, ал фильмнің өзі болса, «нағыз, таза исламға» үңілуге мүмкіндік әпереді. Сонымен бірге, режиссер әйтеуір бір уақытта Иисус Хри­стос туралы да осындай жақсы фильм түсіріліп қалатынына үмітте­нетінін жеткізді. «Шыным­ды айтсам, мен Христос туралы да осындай картина түсірілгенін армандаған болар едім», – деп мәлім­деді Михалков. Бірақ жау­ап­кершілігі өте жоғары бол­ғандықтан, бұл жұмысты өзі қолға алуға бата алмас еді. Лентаның Мәскеудегі көрсе­тіліміне режиссер Маджид Мад­жидидің өзі де қатысты. «Өкі­нішке қарай, бұл дінге ешқандай қатыстары жоқ адамдардың азғын­дығынан соңғы кездері исламға деген нашар көзқарас қалып­тасып отыр. Мен сондықтан өнер призмасы арқылы исламның шынайы кескін-келбеті мен нағыз мәнін көрсеткім келді», – деп түсіндірді ол өз ойын. Режиссер сондай-ақ картинаны негізінен батыс көрермендеріне бағыт ұстай отырып түсіргенін де жасырмады. Себебі, мұсылман емес қауым ақиқат исламның қандай екенін Мұхаммед пайғамбардың образы арқылы танып-білуге тиіс. «Мұхаммед – Жаратқанның елшісі» – кинематография тарихында осы кезге дейін Пайғамбар туралы түсірілген екінші көркем фильм. Картина Мұхаммедтің балалық және жасөспірім шақ­тарынан сыр шертеді. Ол Алла елшісінің өмірі туралы три­логияның бірінші бөлігі болып табылады. Фильмді түсіруге 10 жыл уақыт және 50 млн. долларға жуық қаржы жұмсалған. Руслан ИГІЛІК.