Қазақстан қола жүлдеге таласады

Кеше футзалдан Еуропа чемпионатында сынға түсіп жатқан Қазақстан құрамасы жартылай финал­да Испаниямен кездесті. Тартысты өткен матч қарсы­ластарымыздың пайдасына 5:3 есебімен аяқталды. Кездесуге командамыздың көш­басшы ойыншысы, қақпашы Игита қатыса алмады. Оған алдыңғы ойындарда алған ескертулері себеп болды. Сондай-ақ, тағы бір негізгі ойыншымыз Шыңғыс Есенаманов та жарақаты салдарынан кездесуді алаң жиегінен тамашалауға мәжбүр болды. Соған орай құраманың бас жаттықтырушысы Какау қақпа кілтін Григорий Шомроға сеніп тапсырды. Ол да Игита сияқты қажет кезде қақпасын тастап шығып, шабуылдағы әріптестеріне көмектескенімен, ойынға айтар­лықтай қан жүгірте алмады. Жалпы, Игита мен Есенаманов­тың алаңда жоқтығы матч барысында айқын сезілді. Әйтсе де, командамыздың ойынына жоғары баға бергеніміз жөн. Себебі, құрлықтың алты дүркін чемпионы деген атағы бар азулы қарсыласқа біздің жігіттер лайықты қарсылық көрсетті. Тіпті, алғашқы минуттардан бастап алға ұмтылып, бірінші болып гол соққан Қазақстан еуропалықтарға еріксіз бай шайқатты. Атап айтқанда, кездесудің 4-минутында ұрымтал сәтті мүлт жібермеген Александр Довгань есеп ашты. Алайда, жерлестеріміз бұл ба­сымдықты ұзақ ұстап тұра алмады. Испандар 8-минутта Бебенің көмегімен таразы басын теңестіріп кетті. Осыдан кейін ойын тең жағдайда өрбіп, қос команда алма-кезек шабуылдар ұйымдастырды. Ал үзіліске 3 минут уақыт қалғанда қарсыластарымыз қарқынын кү­шейтіп, бас-аяғы бірер минуттың ішінде екі гол соғып кетті. Алдымен 17-минутта Мигелина мергендігімен көзге түссе, араға бір минут салып Рауль Кампос есепті 3:1-ге жеткізді. Екінші тайм Қазақстанның шабуы­лымен басталды. Дегенмен, Лео мен Серік Жаманқұлов ұйымдастырған бұл шабуыл аяқсыз қалды. Өз кезегінде испандар берілген мүмкіндікті құр жібермей, Алекс 26-минутта командасының төртінші добын енгізді. Ірі есепке қарамастан, біздің жігіттер шабуылдарын жалғастыра берді. Сауатты қимылдаған олар есеп айырмасын бір допқа дейін қысқартқан болатын. Нақты айтсақ, 36-минутта Михаил Першин нәти­желі соққы жасады. Ал арада екі минут өткенде Серік Жаманқұлов чемпионаттағы бесінші голын соғып, отандық жанкүйерлерге үміт сыйлады. Бірақ, біздің көңілімізді соңғы минуттағы Кампостың голы су сепкендей басып тастады. Осылайша, турнирге алғаш рет қатысып, жартылай финалға дейін жеткен Қазақстанды азулы Испания ғана тоқтата алды. Енді отандастарымыз алаң иесі Сербиямен қола жүлдеге таласады. Ал испандар финалда Ресеймен чемпиондық атақты сарапқа салады. Бұл ойындар бүгін ойналады. Еламан ҚОҢЫР, «Егемен Қазақстан».