Атырауда қаруды заңсыз сақтаушы жауапқа тартылды

АТЫРАУ. 16 ақпан. Атырау облысында аңшы қаруын заңсыз сақтаушыға 42 420 теңге айыппұл салынды. Қаруы тәркіленді. Бұл туралы облыстық соттың баспасөз қызметіне сілтеме жасаған egemen.kz тілшісі хабарлады. Қызылқоға ауданының тұрғыны ішкі істер органдарында тіркелмеген тегіс ұңғылы, ЗК моделді, 16 калибрлі аңшы қаруын тұрғын үйінде заңсыз сақтап келген. Осыған байланысты Қызылқоға аудандық сотында қаралған  құқықбұзушыға қатысты әкімшілік іс барысында оның тұрғын үйінде тиісті құжатсыз, тіркелмеген қаруды сақтағаны анықтылды. Мұны құқық бұзушының өзі де растап берді. Ал облыстық ішкі істер департаменті жедел-криминалистика бөлімінің маманы өз қорытындысында заңсыз сақталған қарудың атуға жарамды екенін анықтап берген. Демек, бұл қарудың заңсыз сақталуы қауіпті екенін байқатады. Осындай жайттар ескерілген аудандық соттың қаулысымен атылатын қаруды заңсыз сақтаушы Әкімшілік құқық бұзушылық туралы кодекстің 482-бабының 1-бөлігімен кінәлі деп танылды. Сондай-ақ, кінәлінің қаруы тәркіленіп, оған 20 айлық есептік көрсеткіш мөлшеріндегі 42 420 теңгелік айыппұл салынды. Жолдасбек Шөпеғұл. Дерек: Атырау облыстық сотының баспасөз қызметі. Сурет: kz.otyrar.kz.