Ерлік ешқашан ескірмейді

Кеше Екатеринбург қаласында Кеңес Одағының маршалы Григорий Константинович Жуковтың ескерткіші жанында «Біз миллиондаған панфиловшылармыз» деп аталатын еске алу вахтасын тапсыру рәсімі болып өтті. Шара 1941 жылдың қараша айында Мәскеу түбінде ерлікпен қаза тапқан батыр-панфиловшылардың ерлігіне арналған митинг шеңберінде ұйымдастырылды. Халықаралық еске алу вахтасы 2015 жыл­дың қазан айында Орынбор қаласында бас­тау алған еді. Содан кейін ту Челябі мен Но­во­сібірге және Алматыға атбасын бұрды. Алматыда ту Екатеринбургке 316-шы атқыш­тар дивизиясының аты аңызға айналған командирі Иван Васильевич Панфиловтың немере қыз­дарының қолымен тапсырылды. Екатеринбург вахтаға қатысқан бесінші қалаға айналды. Ал вахта үстіміздегі жылдың күзінде Қызыл Армияның Мәскеу түбінде қарсы шабуылға шығуының 75 жылдығына орай Мәскеуде мәресіне жетеді. Рәсімге Урал федералды округі мен Сверд­­­лов облысының басшылары, Орталық әскери округінің басшылығы, дипломатиялық корпустың өкілдері, Қазақстан мен Орталық Азия халықтарының диаспоралары, ардагерлер мен қоғамдық ұйымдар өкілдері, Урал мемлекеттік педагогикалық университетінің «Стикс» іздеу жасағының мүшелері қатысты. Шара шеңберінде «Ресейдің іздеу қоз­ға­лысы» Жалпыресейлік қозғалысы» Свердлов өңірлік бөлімшесінің жетекшісі Татьяна Хардина 1919 жылы туған, Свердлов об­лысының Нижне-Сергинск ауданының тумасы, хабарсыз кетті деп есептеліп келген қатардағы жауынгер Петр Ябековтің архивтік құжаттары мен солдат медальонын оның туыстарына тапсырды. Жауынгердің мүрдесін «Победа» іздеу жасағы Тверь облысының Ржев ауданындағы Соломино деревнясынан тапқан болатын. «Егемен-ақпарат».