Инвестиция игерудегі ілкімділік

Кеше Орталық коммуникациялар қызметінде Ин­вес­тициялар және даму министрлігінің Инвестициялар комитетінің төрағасы Ерлан Қайыров баспасөз мәс­ли­хатын өткізді. Ол еліміздің инвестициялық тартым­дылығы жөнінде және оларға көрсетілетін қызметтердің қолайлылығы туралы әңгімеледі. Қазіргі таңда елімізге ше­телдік инвесторларды тарту ісі басты мақсаттың бірі екені мәлім. Бұл жөнінде Мемлекет басшысы Үкіметке тиісті тапсырмалар жүктеп, әсіресе, трансұлттық корпорацияларды тарту аса маңызды екенін айтқан еді. Осы жөнінде әңгімелеген комитет төрағасы, бүгінгі күнде инвестиция тартудың көптеген игі шаралары жүргізіліп жатқанына тоқталды. «Биылғы жыл басынан бастап, Астана қаласындағы Халыққа қызмет көрсету орталығында «Бір терезе» қанатқақты жобасы іске қосылды. Инвесторлар «бір терезе» бойынша 360-тан астам рұқсат пен лицензия алады. Бұл инвесторлар мен мемлекеттік органдар арасындағы тіке­лей байланысты болдырмау үшін керек. Оған қоса бюро­кра­тиялық және әкімшілік кедер­гілерді азайту үшін жасалып отыр. Негізі, елімізде бүгін­гі күнде инвесторларға қыз­мет көрсететін 19 бөлім жұмыс істеп тұр. Оның екеуі Аста­нада, үшеуі Алматыда, қалға­ны облыс орталықтарында орна­ласқан. Енді инвесторлар өз уа­қыттарын үнемдей алады. Ешқандай мемлекеттік органға бармай-ақ ХҚО-ға келіп, бір жерден барлық құжаттарын реттей алады. Сондай-ақ, қажет жағдайда консультация да беріледі», деді комитет төрағасы. Шара барысында Қазақстан мен Қытайдың капиталдандыру көлемі 2 млрд. доллар болатын «Жібек жолы» инвестициялық қорының құрылғаны да мәлім болды. Бұл туралы KAZNEX INVEST компаниясының басқарма төрағасы Борисбий Жанғоразов айтты. «Қазіргі уақытта инвестицияларды тарту бойынша жұмыстар қарқынды жүргізіліп жатыр. Соның ішінде негізгі бағыттың бірі ретінде ірі қытайлық компанияларға үлкен мән берілуде. Осы мақ­сатта Инвестициялар комитеті, KAZNEX INVEST компа­ния­сы және ҚХР-дағы Қазақ­стан елшілігі үлкен жұмыс атқа­рып жатыр. Биыл 20-28 қаңтар аралығында министр Әсет Исе­кешев бастаған қазақстандық делегация Бейжіңде болды. Онда ірі компаниялармен 20-ға жуық кездесу өтті. Сөйтіп, ірі инвесторларды елге тарту ісі талқыланды. Қазіргі уақытта Қазақстан мен Қытай арасында индустриялық-инвестициялық әріптестік бағдарламасы іске асырылып отыр. Бүгінде 24 млрд. долларға 52 жобаның тізімі бар. Ол бағдарламаға түрлі саладағы жобалар енген. Атап айтқанда, агроөнеркәсіптік кешен, тау-кен, химия өнер­кәсібі, металлургия, машина жасау және тағы басқалар. Бағдарламадағы әлеуеті жоғары жобалар портфеліне келсек, шамамен 19 мың жұмыс орны ашылады. Бағдарлама аясында трансұлттық корпорацияларды тарту жұмыстары да жүргізіліп жатыр», деген басқарма төрағасы, осыған байланысты аталған жобаларды қаржыландыруды жолға қою үшін бірлескен «Жібек жолы» қоры құрылғанын айтты. Ол Қытай орталық банкінің бө­лімшесі мен KAZNEX INVEST компаниясының келісі­мі негізінде құрылыпты. Жоба­ларды іздестіру және құры­лымдау бойынша жұмыстарды қазақстандық KAZNEX INVEST компаниясы жүргізеді екен. Ал қаржыландыру бойынша нақты шешімді қытайлық тарап шешетін көрінеді. Қордың жалпы капиталдандырылуы 2 млрд. долларды құрамақ. Нұрбай ЕЛМҰРАТОВ, «Егемен Қазақстан».