Мойылды «Толағаймен» толықты

Облыс орталығына қарасты ауылда балабақша ашу облыс әкімдігі мен Eurasian Resources Group S.a.r.l. арасында бекітілген өзара ынтымақтастық туралы меморандумның шеңберінде жүзеге асты. Бұған дейін ауыл тұрғындары кішкентайларды қаладағы балабақшаларға апарып-әкелетін еді. Ауыл қазір қуанышты. Талай жылдар күткен балабақшала­ры ашылды. Бұл ауылдың әлеумет­тік-тұрмыстық жағдайлары­на әсер етті. Бірден 60 тұрғын жұ­мысқа тұрды. Көңілдері кө­теріңкі. Балабақшалары қа­зір­гі заманға сай жарқырап тұр. Бөл­мелерде сәбилер асыр салып ойнап жүр. Барлық жағдай жасалған. Бизнестің әлеуметтік жауапкершілігі осылайша Елбасы тапсырмасына орай ауылға «То­лағай» деген балабақша сыйла­ды. Мойылды жәй ауыл емес. Атақты Мойылды курор­ты орналас­қан жер. Облыс орталығының ір­ге­сінде ғана тұр, 2 мыңдай хал­қы бар. Өзге ұлт өкілдерімен бір­ге, елге оралған көпбалалы ағайындардың да отбасылары тұрады. Қуантсаң баланы қуант. Кіш­­­­кентайларды зарықтырып күттірмей тегін сыйлай ма деп күтті ауыл. Сөйтіп, сыйлықты Ел­басы тапсырмасы бойынша халыққа жеткізді. «Қазақстан Алюминийі» АҚ президенті Арман Есенжоловтың айтуынша, бұл, бизнестің әлеуметтік жауапкершілігінің көрінісі. Ен­ді мұндай игілікті істер Ақсу, Екі­бастұз, Павлодар қалаларында қолға алынбақшы. Ал «Тол­а­ғайды» жекеменшік иесінен 43 мил­лион теңгеге сатып алыпты. Қазір «Толағайға» 120   бүлдіршін барып жүр. Облыстық білім беру басқармасының мәліметінше, өңірде 38 312 бала балабақша­ға барады. Облыс орталығында «Smart Kid», «Лингва», «Озирис» және «Самал» сынды жекемен­шік балабақшалар бар. Сөйтіп, «Ба­лапан» бағдарламасының ша­пағатымен өңірде соңғы жылдары 44 балабақша және 138 шағын орталық ашылса, облыс орталығында 5 020 кішкентайлар оларға баруға жолдама алды. Фарида БЫҚАЙ, «Егемен Қазақстан». Павлодар облысы. Суретті түсірген Валерий БУГАЕВ.