Ауданда әлеуметтік нан бағасы – 40 теңге

Таяуда Ақмола облысының әкімі Сергей Кулагин өзінің Сан­дықтау ауданына барған жұмыс сапары барысында Балқашина ауылындағы наубайхананың жұ­мысымен танысты. Аталмыш кәсіпорын басшысы Таита Докаеваның айтуынша, наубайханадағы әлеуметтік нан бағасы 40 теңгені, ал 620 грамдық бірінші сұрыпты бөлке нанның құны 52 теңгені құрайды. Атап өту керек, 2015 жылы өндіріс ошағы жеке қаражатқа күрделі жөндеуден өткізіліп, 40,0 млн. теңгеге шетелдік нан пісіру қондырғысын сатып алған. Сөй­тіп бүгінде жоба өзінің толық қуаттылығына еніп, тәулігіне 3500 дана нан және нан өнімдерін өндіреді. Бұл жерде нанның 20-ға жуық түрі мен тәтті торттар, бәліштер де пісіру қолға алынған. Өткен жылы серіктестік 30 млн. теңгенің 936 мың бөлке наны мен 340 мың кондитерлік өнім өндірген. Кәсіпорын басшысының айтуынша, бүгінде нанды қолмен пісіру тәжірибесі жоқтың қасы, барлы­ғын техника жасайды, яғни нанды илейді, бөледі, нан пешіне салады. Дайын өнім Сандықтау және Зеренді аудандарында сатылады. «Әлеуметтік нан бағасының құнын қымбаттату жоспарымызда жоқ. Сондықтан жыл аяғына дейін әлеуметтік нан құны 40 теңге болып қалады», деді облыс әкі­міне нау­байхана басшысы Таита Докаева. Бақберген Амалбек, «Егемен Қазақстан». Ақмола облысы.